Senator túrli ákimshiler kásipkerlerge memlekettik qoldaý kórsetetinin atap ótti. Sonyń nátıjesinde bıznesmender ártúrli operatorlardyń alýan túrli derekkózderinen memleket olarǵa qandaı qoldaý baǵdarlamalaryn usynatyny týraly aqparat alýǵa májbúr. Bul depýtattyń pikirinshe, bıznes úshin aqparattyń qoljetimdiligin tómendetedi, sondyqtan kásipkerler tarapynan narazylyq týdyrady.
«ShOB ókilderi memlekettik qoldaý sharalary men ony kórsetýdiń sharttary týraly ártúrli baǵdarlama operatorlarynan aqparat alady. Osylaısha, bıznesti memlekettik qoldaýdyń kópqurylymdy tetikteri kásipkerler tarapynan narazylyq týdyryp otyr. Kásipkerlik sýbektilerine memlekettik qoldaý sharalarynyń tıimdiligin arttyrý maqsatynda Úkimetke memlekettik qoldaý sharalary operatorlarynyń sanyn qysqartý jáne biriktirý arqyly ońtaılandyrý múmkindigin qarastyrýdy usynamyz», dedi Dáýren Ádilbekov.
Senator osyǵan baılanysty ShOB-ty memlekettik qoldaýdyń biryńǵaı aqparattyq portalyn qurý qajet dep sanaıdy, onda kásipkerlerge qajetti barlyq aqparat jınaqtalatyn bolady.
Dáýren Ádilbekov sonymen birge memlekettik qoldaýdyń keıbir baǵdarlamalary bir-birin qaıtalaıtynyn atap ótti. Depýtattyń usynysy – Úkimet taldaý júrgizip, bıznesti qoldaýdyń tıimdi sharalaryn anyqtaýy kerek.
«Qazirgi ýaqytta ár mınıstrlik: UEM, AShM, IIDM, EHÁQM jáne basqalar ShOB-ty memlekettik qoldaý sharalaryn ár jaqtan basqaryp otyr. Barlyq salalarda kórsetiletin memlekettik qoldaýdyń barlyq sharalary boıynsha birde-bir memlekettik organ tolyq aqparat bere almady, árbir memlekettik organ tek óz salasynda ǵana aqparatqa ıe. Memlekettik qoldaý sharalaryn usynýdyń qarapaıym, túsinikti tetikteri bar biryńǵaı qaǵıdalary qajet», dedi senator.
