«Jaqynda Bórli aýdanynyń birqatar sharýa qojalyǵy jetekshileri ózara aqyldasyp, aýdanymyzdyń agroónerkásip keshenin, sonyń ishinde baý-baqsha egý salasyn kóterýge atsalysýdy jón kórdik. Naqtyraq aıtsaq, aýdanymyzdyń ár aýylyna qarasty sharýa qojalyqtary, eger sol aýyldan baý-baqsha egýdi kásip qylamyz degen jandar bolsa, 1-2 gektar jer aýmaǵyn tegin jyrtyp, tyrmalap berýge daıynbyz», deıdi «Amanat» sharýa qojalyǵynyń jetekshisi Baqyt Dalabaev.
Sharýa qojalyǵy basshylarynyń bul usynysyna jergilikti ákimdik te qoldaý bildirip otyr. Qazir ár aýyldan baý-baqsha ósirýmen aınalysýǵa ynta bildirgen jandardyń tizimi anyqtalýda.
«Bul máseleni kóktemgi egistik jumystary bastalǵanǵa deıin anyqtap, aldyn ala josparlap alý úshin erterek kirisip otyrmyz. Eger óńirde baý-baqsha ósirý damysa, aýdan turǵyndaryn qoljetimdi azyq-túlikpen qamtý máselesi jolǵa qoıylady dep oılaımyz», deıdi bastamashyl kásipker.
Aıta keteıik, Baqyt Dalabaev bastaǵan bórlilik sharýa qojalyqtary byltyr mal azyǵynan tapshylyq kórgen Mańǵystaý óńirine de qaıyrymdylyq kómegin uıymdastyrǵan bolatyn.
Qazynaly Qarashyǵanaq kenishi ornalasqan Bórli aýdany – Batys Qazaqstan oblysynyń óndiristi óńiri sanalady. Sonymen birge aýdannyń qunarly topyraǵy munda aýyl sharýashylyǵyn damytýǵa da kóp múmkindik beredi. Aýdanda 13 aýyldyq okrýg bar.
Batys Qazaqstan oblysy
