Qasym-Jomart Toqaev jedelhatta Ábdijámil Nurpeıisovtiń surapyl soǵysty bastan keshkenin, elge oralǵan soń qazaq ádebıetin órkendetýge súbeli úles qosqanyn atap ótti.
«Uzaq jylǵy shyǵarmashylyq qyzmeti jemisti boldy. «Qan men ter» trılogııasy, «Sońǵy paryz» dılogııasy sııaqty týyndylary synshylar men oqyrmandar tarapynan joǵary baǵa aldy. Zaman júgin kótergen romandary álemniń kóptegen tiline aýdaryldy. Ábdijámil Kárimulynyń jańa belesti baǵyndyrǵan qazaq ádebıetin shetelge tanytýǵa sińirgen eńbegi orasan zor. Ol ult rýhanııatynyń kóshbasshysy boldy.
Ábdijámil Nurpeıisov adam janyn tereń túsinetin, túrli taǵdyrdyń beınesin kórkem sýretteı otyryp oqyrmanǵa jetkizgen oıly, keń tynysty jazýshy bolatyn. О́mir boıy qolynan qalamy túsken joq. Qazaq eliniń rýhanı-mádenı salasyn damytý jolynda ólsheýsiz qyzmet atqardy», delingen jedelhatta.
Memleket basshysy sondaı-aq jazýshynyń ult klassıkteriniń jolyn laıyqty jalǵastyryp, ózi de qazaq ádebıetiniń patrıarhyna aınalǵanyn jazady.
«Ábdijámil Nurpeıisovtiń sońynda urpaqqa úlgi, ulysqa ıgilik bolatyn shyǵarmalary qaldy. Elge es, syrtqa ses bolǵan jazýshynyń endi ekinshi ómiri bastaldy. О́negeli ǵumyr keship, sońynda mol mura qaldyrǵan Ábdijámil Kárimulynyń jarqyn beınesi umytylmaıdy. Halqymyz esimin árdaıym ardaq tutady. Marqumnyń ımany salamat, jany jánnatta bolsyn», delingen kóńil aıtý jedelhatynda.
Qalamgermen qoshtasý rásiminde Mádenıet jáne sport mınıstri Dáýren Abaev kóz aldymyzda qazaq ádebıetiniń, ult rýhanııatynyń tutas dáýiri kóship bara jatqanyn aıtty.
«Jas – qartaımaq, joq – týmaq, týǵan – ólmek» desek te, sanaly adamǵa bul qaıǵynyń salmaǵyn saralaý óte qıyn.
Ábdijámil Nurpeıisov – tól ádebıetimiz ben mádenıetimizdi damytý isine ólsheýsiz úles qosqan taý tulǵa.
Talǵampaz oqyrmannyń joǵary baǵasyna ıe bolyp, kózi tirisinde klassıkke aınalǵan qalamger. Týǵan halqynyń ystyq yqylasyna bólengen ultymyzdyń birtýar perzenti.
Esimi ańyzǵa aınalǵan abyz aqsaqal adaldyqtyń aq jolynan taıǵan emes. Árdaıym eldiktiń sózin sóıledi. Jurtynyń búgini men bolashaǵyna alańdaýmen ótti», dedi mınıstr.
Sondaı-aq memleket jáne qoǵam qaıratkeri Qyrymbek Kósherbaev jazýshynyń taǵdyry ońaı bolmaǵanyn atap ótti.
«Buǵanasy bekimeı jatyp qolyna qarý ustap maıdanǵa attandy. Qan qasaptan aman kelip, tól ádebıetimizdiń alybyna aınaldy. Ábe 95 jasqa tolǵan kezde Memleket basshysy Qasym-Jomart Toqaev Almatyǵa arnaıy kelip, «endi ǵasyrlyq mereıtoıyńyzda kezdeseıik» degen tilekpen birge Eńbek Eriniń «Altyn juldyzyn» tósine taǵyp edi. Amal ne, Allanyń ámirine qarsy shyǵý múmkin emes», dedi ol.
Qaraly jıynǵa oqyrmandar men zııaly qaýym ókilderi, Úkimet músheleri qatysty.
Eske salsaq, jazýshy 5 aqpanda 98 jasqa qaraǵan shaǵynda ómirden ótken edi.
