Taý shańǵyshylarynyń da taýy shaǵyldy

Júlde almaýymyzǵa qarsylastar kináli

Qazaqstandyq sportshylardan Olımpııa oıyndarynyń besinshi jarys kúnin konkımen júgirý sportshylary túıindedi. 1 500 metrge erler arasyndaǵy jarysta Qazaqstan atynan Dmıtrıı Morozov synǵa tústi. Osy sport túrinen elimizdiń eń úzdik sportshysy sanalǵan Morozov bul jarysta Olımpıada chempıony Nıderland ókili Keld Nıoısten 3.80 sekýndqa utylyp, Olımpıadany 18-orynmen aıaqtady. Bul – jerlesimizdiń óz karerasyndaǵy úzdik nátıjesi ekenin aıta ketken jón. Ol buǵan deıingi halyqaralyq básekelerde úzdik 20 sportshynyń qatarynan kórinbegen.

Jarystan keıin jýrnalıstermen tildesken Morozov nátıjesine kóńili tolatynyn jetkizdi. «Árıne, úzdikter qatarynan kórine almaǵanym ókinishti. Alaıda óz nátıjeme kóńilim tolady. Dese de taktıkalyq jáne fızıkalyq turǵyda áli jetildiretin tustarym kóp. Alda mass-start básekesi bar. Eki qashyqtyqta júldege talasyp kóremin. Mass-startty konkımen júgirýdegi lotereıa dep aıtýǵa bolady. Bul jarysta kimniń baǵy janady, sol chempıon bolady. Qytaıdaǵy muz elordadaǵy «Alaý» muz aıdynyna qatty uqsaıdy eken. Zaıybym Nadejdanyń (Mo­rozova) jarysqa túsken sátin tek teledıdar arqyly ǵana tamashalap júrmin. Biraq ekeýmiz kúnde birge jattyǵamyz», dedi ol.

Sonymen qatar konkımen júgirýden Qazaqstan komandasynyń bas bapkeri Dmıtrıı Babenko Morozovtyń kór­set­kishine óz baǵasyn berip, shákirti qarsy­lasynyń kesirinen úzdikter qataryna ilige almaı qalǵanyn aıtty.

– Kórsetkish men kútkendeı bolǵan joq. Alaıda ol óziniń sporttyq karera­syndaǵy eń úzdik nátıjesin tirkedi. Moro­­zovqa qarsylas sátsiz tústi. Ol (qy­taı­lyq qarsylasy Lıan Szyven) kóbine sprınt­ke beıim eken. Alǵashqy metrlerde ekpin alyp, qalǵan bólikterge kúshin durys jumsaý mańyzdy edi. Sondyqtan Dmı­trıı jolaqqa shyqqanda kedergi kel­tirmes úshin alǵashqy 300 metrde baryn saldy. Ári qaraı beıimdelý qıyn boldy. Sol sebepti sońǵy aınalym oǵan óte aýyr soqty. Eger qarsylasy yńǵaıly bol­ǵanda, Dmıtrııdiń nátıjesi budan da jaq­sy bolar ma edi?! Bul – onyń alǵashqy Olım­pıadasy bolǵandyqtan, shákirtimniń nátı­jesine kóńilim tolady, – dedi bas bapker.

Osy qashyqtyqty 32 jastaǵy Keld Nıoıs 1:43.21 ýaqyt kórsetkishimen jú­rip ótip, 2002 jylǵy Solt-Leık-Sıtı Olım­pıadasynan beri jańarmaı kele jatqan Olımpıada rekordynyń mur­tyn buzdy. Buǵan deıingi rekord AQSh sportshysy Derek Parraǵa tıesi bolǵan edi. Ol bul qashyqtyqty 1:43.95 ýaqytta baǵyndyrǵan. Bul – Nıderland sport­shysynyń Olımpııa oıyndaryndaǵy úshinshi altyn medali. 2018 jylǵy Phenchhan­daǵy dodada Nıoıs 1000 jáne

1 500 metrge jarysýda aldyna jan salmaı, tuǵyrdyń bıik satysynan kóringen-di.

Sonymen qatar dál osy 1 500 metr­ge jarysýdaǵy álem rekordy Keld Nıoıske tıesili. Ol bul rekordyn 2019 jyl­dyń naýryzynda Solt-Leık-Sıtıde ótken álem birinshiliginde jasaǵan edi. Ýaqyt kórsetkishi – 1:40.17. Endi Olımpııa oıyndarynyń da, álem chempıonatynyń da rekordy Keld Nıoıske tıesili bolyp otyr. Atalǵan qashyqtyqta kúmis júl­deni Nıoıstiń otandasy, úsh dúrkin álem chempıony Tomas Krol ıelendi. Sóıtip ol Olımpıadadaǵy alǵashqy júldesine qol jetkizdi. Al qola júlde Phenchhan Olımpıadasynyń kúmis jáne qola júldegeri Ońtústik Koreıa ókili Kım Mın Soktyń enshisinde.

Márege jetýdiń ózi de armanǵa aınaldy

Sonymen qatar taý shańǵysy spor­tynyń slalom túrinde Qazaqstan qura­masynan Aleksandra Troıskaıa óner kórsetti. Olımpııa oıyndaryna tuń­ǵysh ret qatysyp jatqan 18 jas­­taǵy jerlesimiz, ókinishke qaraı, ja­rys­­ty sońyna deıin aıaqtaı almady. Máre syzyǵyna deıin jetip kele alma­ǵan­dardyń qatarynda Troıskaıadan bólek, osy jarystyń basty favorıti, Sochı jáne Phenchhan Olımpıadasy­nyń jeńim­pazy, bir­neshe dúrkin álem chempıony ame­rıkalyq Mı­kaela Shıffrın de bar. Sóıtip ol da alǵashqy múmkindikte júl­desiz qaldy.

Bul básekede altyn medal 2019 jyl­ǵy álem chempıony slovakııalyq Petra Vl­govaǵa buıyrdy. Al aýstralııalyq Katarına Lınsberger Olımpııa oıynda­rynyń eki dúrkin kúmis júldegeri atandy. Ol tórt jyl burynǵy Ońtústik Koreıadaǵy dodanyń komandalyq jarysynda kúmis medaldy moınyna ilgen edi. Sondaı-aq Phenchhanda Olımpıadanyń úsh júldesin (altyn, kúmis, qola) qorjynǵa salǵan shveısarııalyq Vendı Holdener Beıjińde alǵashqy qolasyn jeńip aldy.

Jarystan keıin Aleksandra Troıskaıa óziniń alǵashqy Olımpıadasy jáne keshegi óneri týraly pikir bildirdi. «Bas bap­kersiz jattyǵý maǵan óte qıynǵa soqty. Sondyqtan óz qateligimdi syrttaı kóre almaǵandyqtan, jarys týraly eshteńe aıta almaımyn. Mundaǵy jarys joly rasynda qıyn, maǵan yńǵaısyzdyq týdyrdy. Birinshi múmkindigimdi barynsha nátıjeli aıaqtaǵym kelgen edi. Alaıda bári men oılaǵandaı bolmady. Qazaqstanda Beıjińdegideı qatty qar men muz joq. Onyń ústine, tájirıbesiz, jattyǵýsyz básekelesý qıynǵa soqty. Dese de, bul men úshin úlken tájirıbe boldy dep aıta alamyn», dedi Aleksandra.

Erler arasyndaǵy shańǵy jarysynyń erkin stılinde úsh dúrkin Olımpıada, alty dúrkin álem chempıony norvegııalyq Iohannes Hıosflot Klebo aldyna jan salmady. Italııalyq Federıko Pellegrıno qatarynan ekinshi márte Olımpııa oıyn­dary­nyń kúmis júldegeri atandy. Ol Phench­handa da osy qashyqtyqta kúmis júl­deni moınyna ilgen edi. Reseılik Alek­sandr Terentev qola medaldy qa­naǵat tutty.

Áıelder básekesinde shvesııalyq qyz­dar jasyndaı jarqyldady. Álemniń eki dúrkin chempıony Ionna Sýndlıng bas júldeni oljalasa, taǵy bir álem chempıo­ny Maııa Dalkvıst ekinshi orynǵa ta­ban tiredi. Úshinshi satyǵa Phench­handa komandalyq saıysta top jarǵan ame­rıkalyq Djessıka Dıggıns jaıǵasty.

Snoýbordta tórt jyl burynǵy Olım­pıada chempıony chehııalyq Ester Ledeskaıa jeńiske jetse, aýstrııalyq Danıela Ýl­bıng pen slovenııalyq Glorııa Kotnık júldegerler qatarynan kórindi. Erler jarysynda Sochı Olımpıadasynyń qola júldegeri aýstrııalyq Karl Bend­jamın altyn tuǵyrdan kórindi. Slove­nııalyq Tım Mastnak pen reseılik Vık Ýaıld Olımpıadanyń kúmis jáne qola medaldardy ózara bólisti.

Frıstaıl bıg-eırden ótken jarysta Qytaı qyzy Gý Aılın altynnan alqa taqty. Fransııalyq álem chempıony Tess Ledıo kúmis alsa, shveısarııalyq Matılda Gremo qola medaldy moınyna ildi.

Kósh basynda – Norvegııa

Olımpıadanyń alǵashqy alty kúninde 23 eldiń sportshylary júlde alyp úl­gerdi. Kósh basynda Norvegııa sportshylary tur. Búginge deıin olar 4 altyn, 1 kúmis jáne 4 qola medal ıelendi. Ekinshi jáne úshinshi oryndardy Shvesııa (4+1+2) men Nıderland (3+3+1) ózara bólisýde. Alǵashqy altynyna keshe ǵana qol jetkizgen AQSh sportshylary 1 al­tyn, 5 kúmis jáne 1 qola medalmen 10-orynda tur. Ázirge eń kóp júlde (10) ol­ja­laǵan Reseı quramasy 2 altyn, 3 kú­mis, 5 qolamen 8-satyǵa jaıǵasqan.