Senatorlar Aýyl sharýashylyǵy mınıstrliginiń, joǵary oqý oryndarynyń ókilderimen jáne fermerlermen birlese otyryp sıfrlandyrýdy, ǵarysh monıtorıngi tehnologııasyn engizý jáne aýyl sharýashylyǵy jerlerin qashyqtan zondtaýǵa qatysty máselelerdi talqylady.
Senat komıtetiniń hatshysy Aqylbek Kúrishbaev agrarlyq salany damytýda aýyl sharýashylyǵy prosesterin sıfrlandyrýdyń mańyzy zor ekenin, Memleket basshysy Qasym-Jomart Toqaev óziniń Qazaqstan halqyna Joldaýynda AО́K-ke joǵary tehnologııalardy engizý mindetterin sol úshin de qoıǵanyn atap ótti.
«Aýyl sharýashylyǵyn sıfrlandyrýdyń basty mindeti – ónimdi óndirýge jumsalatyn shyǵyndardy azaıtý, onyń sapasyn arttyrý jáne sybaılas jemqorlyqqa jol bermeý bolyp otyr. Bul turǵyda sıfrlyq tehnologııalardy engizýdiń álemdik tájirıbesin qoldaný aıtarlyqtaı ekonomıkalyq tıimdilikke qol jetkizedi», dep atap ótti senator Aqylbek Kúrishbaev óz sózinde.
Elimizdiń aýyl sharýashylyǵy mınıstrliginiń ókilderi kezdesý barysynda osy baǵytta júrgizilip jatqan búgingi tańdaǵy jumystar týraly aıtyp berdi. AО́K memlekettik qyzmetterin damytý jáne sıfrlandyrý departamentiniń dırektory Bernat Alpysbekovtyń aıtýynsha, elimizdiń mal sharýashylyǵyndaǵy seleksııalyq jumystar men asyl tuqymdy esepke alý prosesin sıfrlandyrý Plem.kz saıtynda júzege asýda.
«Budan basqa, avtomattandyrylǵan «E-Agriculture» biryńǵaı júıesi qyzmetiniń arqasynda bıznes-prosesterdi sıfrlandyrý arqyly aýyl sharýashylyǵy taýaryn óndirýshilerdiń rásimderi aıtarlyqtaı jeńildedi. Aýyl sharýashylyǵyndaǵy otandyq óndirýshiler men ishki jáne syrtqy saýdaǵa basqa da qatysýshylar memlekettik mekemelerge barmaı-aq elektrondyq ilespe qujattardy alýǵa múmkindigi bar», dep atap ótti ol.
Kezdesýge qatysqan aýyl sharýashylyǵy taýaryn óndirýshiler ózderiniń óndiristik prosesterin sıfrlandyrýǵa áldeqashan kiriskenderin atap ótti. Mysaly, «Atameken-Agro» kompanııasynda sıfrlandyrý prosesi 2014 jyly iske qosyldy. Qazir olar kásiporynda jerdi qashyqtyqtan zondtaýdyń jáne egistikterge spýtnıktik monıtorıng júrgizýdiń zamanaýı júıesin paıdalanady.
Parlamentshiler Aqmola oblysyn aralaý barysynda sıfrlyq tehnologııalardy kúndelikti ómirde qoldanatyn jergilikti qus fabrıkasynyń jumysymen tanysty. Kásiporyn alańynda jumys isteıtin ortalyq dıspetcherlik qyzmet depýtattarǵa avtoparkti basqarýdy ońtaılandyrý men beınebaqylaý júıesi jáne kólikti GPS-qadaǵalaý qurylǵysy arqyly shyǵyndardy qysqartý múmkindigin paıdalanatynyn aıtyp berdi.
«Aýyl sharýashylyǵy óndirisiniń ókilderi egis alqaptaryn ulǵaıtý, sýarý, mal sharýashylyǵy men ósimdik sharýashylyǵyn damytý turǵysynda prosesterdi sıfrlandyrýdyń kóptegen oń mysaldaryn alǵa tartty. Shynynda da bul taqyryp asa mańyzdy. Senatorlar AО́K-ti jaqsartý jónindegi zańnamalyq bazany odan ári damytý úshin osy usynystardy paıdalanatyn bolady», dedi senator Olga Býlavkına.
«Shańyraq» basqarýshy kompanııasy» JShS Baıqaýshylar keńesiniń tóraǵasy, Qazaq ulttyq agrarlyq zertteý ýnıversıtetindegi Agroınnovasııa jáne ekologııa ǵylymı-zertteý ınstıtýtynyń dırektory, S.Seıfýllın atyndaǵy Qazaq agrotehnıkalyq ýnıversıteti KEAQ Basqarma tóraǵasy-rektory jáne basqalar baıandama jasap, usynystaryn aıtty.
Senatorlar kóshpeli kezdesýdi qorytyndylaı kele, osy shara barysynda aıtylǵan usynystar men máseleler dóńgelek ústel barysynda talqylanyp, usynym túrinde Úkimetke jiberiletinin atap ótti.
