«Sheksiz múmkindikter» jobasy aıasynda múmkindigi shekteýli balalarǵa arnalǵan bul ortalyqta sporttyń fýtbol, paýerlıftıng, shahmat, doıby, toǵyz qumalaq, ústel tennısi jáne sadaq atý sııaqty túrleri boıynsha seksııalar jumys isteıdi.
Sport ortalyǵynyń ashylý saltanatynda sóz sóılegen Jezqazǵannyń ákimi Qaırat Ábsattarov múmkindigi shekteýli jandar úshin aralasatyn ortaǵa degen qoljetimdiktiń bolýy asa mańyzdy qajettilik ekenin atap ótti.
– Bul ortalyqta olar sportpen shuǵyldanyp qana qoımaı, ózderiniń qurby-qurdastarymen aralasyp, jańa dostar da taba alady. Sport – múmkindigi shekteýli jandarǵa belsendi de tolyqqandy ómir súrýge, rýhty túsirmeýge jáne jeńiske jetýge múmkindik beretin keremet kúsh. Sondyqtan ortalyqtyń kóp uzamaı qaladaǵy súıikti oryndardyń birine aınalatynyna senimdimin, – dedi ol.
Joǵaryda aıtyp ótkenimizdeı, atalǵan sport ortalyǵynan basqa Jezqazǵanda erekshe qajettilikteri bar 55 bala shuǵyldanatyn «Aıaly alaqan» kúndizgi beıimdeý ortalyǵy jumys isteıdi. Sonymen birge qalada aýtıstik spektri buzylǵan balalarǵa arnalǵan taǵy bir ortalyq ashý josparda bar.
Al jańadan ashylǵan ortalyqta arnaıy oqý kýrsynan ótken segiz jattyqtyrýshy erekshe qajettiligi bar jandardy sporttyń qyr-syryna baýlıtyn bolady.
Jezqazǵan
