Bul degenińiz – jeke sot oryndaýshylardyń qyzmetine kelip túsken 100 myń aryz-shaǵym degen sóz. Sebebi jeke sot oryndaýshylar is qozǵap, shara qoldanǵanymen, aıyppuldyń tólengen-tólenbegenin aldyn ala teksere almaıdy. Jeke sot oryndaýshylardyń qyzmetine qatysty mundaı derekter Ádilet mınıstrligi jáne Jeke sot oryndaýshylarynyń respýblıkalyq palatasynyń muryndyq bolýymen ótken dóńgelek ústel barysynda aıtyldy.
Májbúrlep oryndatý sharalarynyń ózekti máseleleri talqyǵa túsken basqosýǵa Senat jáne Májilis depýtattary, memlekettik organ ókilderi, advokatýra, notarıat, zań keńesshileri, sonymen qatar úkimettik emes uıym men qoǵam belsendileri qatysty. Dóńgelek ústeldi alǵysózimen ashqan Ádilet mınıstri Qanat Mýsın jeke sot oryndaýshylardyń jumysynda kemshilikter bar ekenin aıta kelip, qoǵamda qyzý talqylanyp júrgen ózekti máselerdi sheshý qajettigine nazar aýdartty. Mınıstr atqarýshylyq is júrgizýde eń bastysy – azamattardyń quqyqtaryn qorǵaý ekenin de eskertip ótti. Ol sondaı-aq múlikke tyıym salý, tyıymnan bosatý, sondaı-aq bankter arqyly elektrondy túrde tyıym salý sekildi suraqtardy jan-jaqty talqylap, bul suraqtarǵa naqty ári zańdy jaýap tabý qajettigin aıtty. «Búgingi basqosýymyzdyń basty maqsaty da osy – jeke sot oryndaýshylardyń jumysyna qatysty aıtylatyn problemalardy sheshý jolyn tabý. О́ıtkeni azamattarymyzda bul qyzmetke baılanysty kóptegen suraq týyndap jatyr», dedi Q.Mýsın.
Jıynda baıandama jasaǵan Jeke sot oryndaýshylarynyń respýblıkalyq palatasynyń basqarma tóraǵasy Ernar Ibraev bul saladaǵy túıtkildi máselelerdiń úsh negizgi blogyn atap kórsetti. Olar – azamattardyń atqarý satysyna deıingi, oryndaý kezeńindegi jáne jeke sot oryndaýshylary ınstıtýtyndaǵy máseleler. «Jeke sot oryndaýshylary jumysynda áli de kemshilikter bar ekenin moıyndaımyz jáne ashyq aıtamyz. Biraq sonymen birge, jekelegen memlekettik organdar tarapynan atqarý júıesine áser etetin kemshilikter de bar», dedi ol. Ákimshilik ister jónindegi sot alqasynyń tóraǵasy Aslan Tókıev jeke sot oryndaýshylar ústinen qozǵalatyn sot isteriniń jartysynan kóbi shaǵymdanýshy paıdasyna sheshiletinin atap ótti.
Azamattardyń quqyǵyn qorǵaýǵa arnalǵan jıynda atalǵan saladaǵy zańdy ózgertý, bıýdjetke qarajattyń túsýin tirkeıtin biryńǵaı elektrondy júıe engizý máseleleri de sóz boldy. Osy máselelerdi sheshý úshin Ádilet mınıstrligi, Jeke sot oryndaýshylarynyń respýblıkalyq palatasy, Qarjy naryǵyn retteý jáne damytý agenttigi jáne Qazaqstan qarjygerleriniń qaýymdastyǵy birlesip ekinshi deńgeıli bankter tarapynan qoldanystaǵy zańnama talaptaryn qatań saqtaý máselesin pysyqtaý qajet.
Jıyn barysynda atqarýshylyq óndiristegi ózekti máseleler ashyq aıtylyp, májbúrlep oryndatý sharalary júıesin jetildirý úshin usynystar beriledi.
