Kúnestegen kógershinder

Osydan kemi bes-alty jyl buryn «Jipsiz baılanǵandar» atty shyǵarma oqyǵanmyn. Smartfonǵa telmirgen biz týraly drama­lyq dúnıe. Jazylǵan boıda, áli esh jerde jarııa­lanbaı turyp, aqyn-jazýshy aǵam «oqyp kór» dep jibergen bolatyn. Jelidegi alaıaqtyq, bir-birin aldap soǵý, aqyr sońynda tuzaqqa túsýi týraly jaqsy dúnıe. Sol beti eshqaıda jarııalanbady ǵoı deımin. Ol kezde qazirgiden góri el kóbirek otyratyndaı kórinetin áleýmettik jelide. Búginde bul «aýrý» bizde de seıileıin degen sııaqty. Basqa elder de basynan osylaı keshken shyǵar. Bizdiń qazaq qoǵamy da bul satydan óte shyǵaryna senemiz.

Bertinirekte kisi kóp jınalatyn oryn­darǵa kirip barsań, qystygúni shatyrdyń kúngeı betinde retti-retsiz, beı-bereket kúnes­tep otyrǵan kógershinderdi eske túsiretin jelige jipsiz baılanǵandar. Jaıshylyqta toptalyp nemese jubymen ushyp júrgende baıqalmaǵanymen, kógershinderdiń erekshe­likteri, bir-birinen aıyrmashylyǵy álgindeı bolyp otyrǵanda jaqsy baıqalady. Ara­synda biren-saran aǵy kezdesedi. Ár-ár jerindegi sarǵysh sekpilderine sheıin súı­kimdi kórinetin. Kók kógershinderdiń jas-kárisi de sonda bilinetin. Tipti erkek-urǵa­shysyn da ajyrata alasyz. Keıbiriniń jún­deri úrpıisip, sabalaqtanyp, qataryndaǵy bas­qalarynan aıbyndyraq kórinedi. Sóıtse de bári beıqam, kúnnen túsetin qyzýǵa ári bir-biriniń meıirimine jylynyp otyrǵan­daı seziledi. Tipti moıyndaryna moıyndaryn aıqastyryp, qushaqtasqandaı bolady. Qushaqtary bolmasa da bir-birine solaı ja­qyndasyp, jylý syılasa kerek. Qanat bit­kenimen bularda qushaq joq qoı. Al adamda qanat bolmaǵanymen, qushaq bar. Biraq adam adamnan alystaǵan kúni ol da kereksiz bolyp qalmaı ma? Kisi balasy alysty kóksegen s­aıyn jalǵyz.

Kúnestep otyrǵan kógershinder ózara jylý almasyp qana qoımaıdy. Bir-birine súıe­nisip, biriniń ústine ekinshisi tumsyǵyn qoıy­syp, tumsyqtarymen arqalaryn qasy­syp jatqanda qaraptan-qarap turyp qaı­ran qalasyń. Qoldary joq bolsa da bir-birin tumsyǵymen túrtinekteıdi. Qolsyz da qolǵa­bys qyla beredi. Sóıtip uzaq otyrady. Sha­masy qatty boran men aıazdan ashyl­ǵan kún­deri osylaı istese kerek. Olar kóshede, joldyń boıynda júrse de adamdardan meıirim kútip, qamqorlyq tileıdi. Juptaryn jazbaıdy kóbine. Esim endi kire bastaǵan bala kúnnen beri janymnan óshpeı kele jatqan osy sýret kóz aldyma jıi keledi. Aspandap ushqan olardy jipsiz baılaǵan ne qudiret? Ne de bolsa naǵyz qudiret sol!