Polıseıler bir aı buryn joǵalǵan balalardy tapty

Almaty oblysynyń polıseıleri budan bir aı buryn joǵaldyǵa sanalǵan eki jasóspirimdi tapty. Bul týraly NewTimes.kz habarlady. «Ústimizdegi jylǵy 28 aqpan kúni Eńbekshiqazaq aýdany Esik qalasynda turatyn kámeletke tolmaǵan Dáýlet Dáýken men Tynyshbek Abbatov Almaty qalasyna ketken jerinen izim-qaıym joǵalyp ketti», - delingen Almaty oblysy ishki ister departamentiniń baspasóz qyzmeti. «Balalardyń ata-analary eki táýlikten keıin Eńbekshiqazaq aýdandyq ishki ister bólimine kómek surap keledi. Resmı shaǵym jasalǵannan keıin polıseıler joǵalǵan balalardy izdeýge óz kúshterin ǵana emes, sonymen birge jergilikti jalpy bilim beretin mektepter muǵalimderin tartty», - delingen habarlamada. Polıseıler aıtqandaı, joǵalǵan jasóspirimder oqta-tekte óziniń dostary men týǵan-týystaryna baılanysqa shyǵyp turǵan. Biraq telefon nómirin jıi aýystyryp turǵandyqtan, olardyń qaıda júrgenderin tap basyp tabý qıynǵa túsken. Polıseıler eki ret balalar jaldap turǵan páterlerdi de taýyp barǵan. Alaıda, sol kezde olar bul jerlerden ketip qalǵan boldy. «Izdeýde júrgen balalardyń aıtýlarynsha, bul ýaqyttyń bárinde olar bireýiniń úıinen ata-ananyń ruqsatynsyz alyp ketken aqshaǵa (9 myń dollarǵa jýyq) ómir súrgen. Polıseıler jedel jolmen jasóspirimderdiń turǵan jerlerin taýyp, olardy Almatydan Astanaǵa ketpek bolyp turǵan kezderinde qolǵa túsirdi», - dep atap kórsetti baspasóz qyzmeti. Málim bolǵandaı, qazir balalar úılerine jetkizilgen. Murat Aıtqoja. Derekkóz: NewTimes.kz. Foto: www.idrive.kz.