Keńeske Prezıdent Ákimshiliginiń, salalyq memlekettik organdardyń, «Atameken» UKP, «Samuryq-Qazyna» UÁQ» AQ jáne ǵylymı qoǵamdastyqtyń ókilderi qatysty. Vıse-premer ǵylymnyń óndirispen ózara baılanysynyń mańyzdy rólin, halyqtyń eńbek tabysyn ósirýdegi ǵylymnyń úlken áleýetin atap ótti.
Halyqtyń tabysyn arttyrý baǵdarlamasynyń jobasynda 1700 jańa jumys ornyn qura otyryp, ǵylymı jáne ǵylymı-tehnıkalyq qyzmetti kommersııalandyrýdyń 200-ge jýyq jobasyn iske asyrý kózdelgen.
E. Toǵjanov halyqtyń eńbek tabysyn arttyrýǵa ǵylymnyń úlesin kúsheıtý jónindegi sharalardy qosymsha pysyqtaýdy tapsyrdy. Keńeste ǵalymdardy qoldaý, ǵylymı ınfraqurylymdy jańǵyrtý, ǵylym, óndiris pen bıznestiń ózara is-qımylyn keńeıtý jónindegi naqty sharalardy qamtıtyn ǵylymdy damytýdyń 2022-2026 jyldarǵa arnalǵan tujyrymdamasynyń jobasy talqylandy.
Sondaı-aq, Bilim jáne ǵylym mınıstrligi tehnıkalyq ǵylymdardy, ınjınırıng pen tehnologııalardy damytýǵa basa nazar aýdara otyryp, 951 perspektıvaly ǵylymı ázirlemelerdiń tizimin tanystyrdy. Budan basqa, salalyq memlekettik organdar janynan ǵylymı-tehnıkalyq keńester qurý arqyly jer qoınaýyn paıdalanýshylardyń ǴZTKJ-ǵa aýdarymdaryn bólý tetigi qaraldy.
Keńeske qatysýshylardyń usynystaryn tyńdaǵan Premer-Mınıstrdiń orynbasary zertteýlerdiń óndiristik ǵylymǵa áserin kúsheıtý, halyqaralyq tehnologııalyq kompanııalarda qyzmet etetin jetekshi ǵalym otandastardy tartý, tájirıbelik-konstrýktorlyq ázirlemelerdiń úlesin arttyrý, ekonomıka men áleýmettik salanyń naqty mindetterin sheshý úshin ǵylymı ınstıtýttardyń, kásiporyndardyń zerthanalyq jabdyqtardy birlesip paıdalanýy boıynsha sharalar qabyldaýdy tapsyrdy.
