QR Aýyl sharýashylyǵy mınıstrligi azyq-túlik tapshylyǵy bolatyny týraly qaýesetti joqqa shyǵarǵan.
«Elimizdegi azyq-túlik qaýipsizdigi, sondaı-aq aýyl sharýashylyǵy qurylymdarynyń úzdiksiz jumysy máselesi turaqty baqylanady. Jedel derekter boıynsha, respýblıka boıynsha barlyǵy 1,5 mln tonna áleýmettik mańyzy bar azyq-túlik taýarlarynyń (ÁMAT) qory bar, onyń ishinde un – 145,1 myń tonna, qant – 47,6 myń tonna, kúrish – 40,2 myń tonna, makaron – 21,3 myń tonna jáne 1 mln tonna kókónis ónimderi jáne taǵy basqasy», – dep habarlady vedomstvodan.
Sondaı-aq mınıstrlik málimetinshe, eldegi azyq-túlik qory únemi tolyqtyrylyp otyrady. Un óndirý úshin jarma men astyq jetkilikti, al mal basy et ónimderin óndirýge jetkilikti.
«Respýblıka óz óndirisi esebinen ishki astyq naryǵyndaǵy qajettilikti tolyq kólemde qamtamasyz ete alady», – dedi AShM-nan.
Vedomstvo ókilderi Qazaqstanda AО́K damytýdyń 2021-2025 jyldarǵa arnalǵan Ulttyq jospary iske asyrylyp jatqanyn eske saldy. Onyń aıasynda ımportty almastyrý boıynsha belsendi jumys júrgizilýde.
Qazirgi ýaqytta Qazaqstanda defoltqa alǵysharttar joq. Standard&Poor’s halyqaralyq reıtıng agenttigi Qazaqstannyń táýelsiz kredıttik reıtıngin «BBB-/A-3» deńgeıinde rastady, boljam «Turaqty». Agenttiktiń derekterine sáıkes, Reseıge qatysty ekonomıkalyq sanksııalardyń qaıtalama saldaryn eńserýge bolady jáne Qazaqstanda bul munaı men gaz eksportynyń negizgi naryqtaryna qol jetkizýde irkilisterge ákelmeıdi.
