«13 naýryzda saǵat 01:07-da SQO Tótenshe jaǵdaılar departamentiniń «О́rt sóndirý jáne avarııalyq-qutqarý jumystary qyzmeti« MM-niń «101» telefonyna Máskeý ótkelindegi 4 páterli kirpish turǵyn úıde (Bereke shaǵynaýdany) órt shyqqany týraly habarlama tústi.
О́rt sóndirýshiler saǵat 01:13-te kelgen sátte úıdegi № 3 páter janyp jatqany anyqtaldy. Úıdiń shatyry órtke oranǵan, qoıý tútin basqan. О́rttiń shyǵýy týraly habarlama quzyrly organǵa kesh berildi», - delingen habarlamada.
Qutqarýshylar jalyndy dereý sóndirýge kirisken.
«О́rtti sóndirý barysynda 1975, 1979, 1960 jyldary týǵan eki er adamnyń jáne 1960, 1967 jyldary týǵan 2 áıel adamnyń deneleri tabyldy. Qaıtys bolǵan adamdardyń deneleri sot-medısınalyq saraptamaǵa jiberildi. Úı ortalyq jylytý júıesine qosylǵan. О́rt saǵat 01.53-te aýyzdyqtalyp, saǵat 02.24-te sóndirildi», - dedi QR TJM-nan.
Apatty jaǵdaıdy joıýǵa Petropavl qalasy 4 órt sóndirý bóliminiń (№1, 2, 3 jáne 5) 30 órt sóndirýshisi men 6 birlik tehnıkasy jumyldyryldy. Tilsiz jaý 60 sharshy metr aýmaqty sharpydy.
«О́rttiń shyǵýyna alkogoldik ishimdik iship, tósekte temeki tartý sebep bolýy múmkin degen boljam bar. Keltirilgen shyǵyn mólsheri anyqtalýda.
2022 jylǵy 1 aqpanda № 5 órt sóndirý bóliminiń qyzmetkerleri aýla aralaý jumystary barysynda órtte qaıtys bolǵan er adamdardyń biri, 1960 jyly týǵan er adamǵa órt qaýipsizdigi erejeleri jazylǵan jadynama tabys etken bolatyn. Qaza tapqandar halyqtyń áleýmettik osal toptary sanatyna jatpaıdy, spırttik ishimdik ishetin adamdar retinde esepke alynbaǵan. Kýágerlerdiń aıtýynsha, órt shyǵar aldynda qaıtys bolǵandar spırttik ishimdik ishken», - dedi QR TJM baspasóz qyzmetinen.
Málim etilgendeı, bıyl SQO aýmaǵynda 115 órt boldy, onda 12 adam qaza tapty, 4 adam zardap shekti. Keltirilgen materıaldyq shyǵyn shamamen 72 mln teńgeni qurady.
