«Teris syrtqy ekonomıkalyq qubylystarǵa jedel den qoıý sheńberinde Úkimet pen Ulttyq Bank Birlesken is-qımyldar josparyn iske asyrýda. Atap aıtqanda, qarjy naryǵynyń ornyqtylyǵyn jáne teńgelik depozıtterdiń tartymdylyǵyn qamtamasyz etý maqsatynda Úkimet Ulttyq bankpen birlesip, memlekettik bıýdjet esebinen halyqtyń depozıtteri boıynsha syılyqaqy esepteýdi kózdeıtin Teńgelik salymdardy qorǵaý baǵdarlamasyn ázirledi», delingen habarlamada.
Úkimet málimdemesindegi derek boıynsha, ekinshi deńgeıdegi bankterde 2022 jylǵy 12 naýryzdaǵy jaǵdaı boıynsha shamamen 15,3 trln teńge nemese aktıvterdiń 40% quraıtyn ótimdiligi joǵary aktıvterdiń birshama qory bar.
Erkin ótimdiliktiń bolýy bankterge óz mindettemelerine ýaqtyly jáne tolyq kólemde qyzmet kórsetýge múmkindik beredi. Bankterdiń ótimdilik boıynsha prýdensııalyq normatıvteri retteýshiniń eń tómengi talaptarynan tórt eseden astam artyq. Zańda belgilengen shekte jeke tulǵalardyń depozıtterine memleket kepildik beredi.
Qańtar aıynda halyqtyń teńgelik jınaq depozıtteri boıynsha kepildik somasy 20 mln teńgege deıin, sondaı-aq túrleri men valıýta boıynsha ártúrli depozıtterge kepildik berýdiń eń joǵary jıyntyq somasy «Qazaqstannyń depozıtterge kepildik berý qory» AQ tarapynan ulǵaıtyldy.
Budan basqa, baǵanyń ósýin tejeý maqsatynda Úkimet Inflıasııany baqylaý jáne tómendetý boıynsha sharalar keshenin iske asyrýda.
«Ol ónim óndirý kólemin ulǵaıtýǵa, saqtaý men logıstıkaǵa, bólshek saýdaǵa, baǵa belgileýdi baqylaýǵa, monopolııaǵa qarsy jáne syrtqy saýdany retteýge baǵyttalǵan jedel jáne orta merzimdi sıpattaǵy is-sharalardan turady. Jalpy, Úkimet, Ulttyq bank jáne Qarjy naryǵyn retteý jáne damytý agenttigi jaǵdaıdy baqylaýda ustaýda. Bul úshin kún saıyn Daǵdarysqa qarsy sharalar jónindegi jedel shtab otyrystary ótkiziledi. Onyń sheńberinde ekonomıkalyq jaǵdaıdyń damýynyń ártúrli ssenarııleri boıynsha sheshimder pysyqtalady», dep jazylǵan habarlamada.
QR Úkimeti halyqty úreılenbeýge jáne resmı aqparat kózderine ǵana senýge shaqyrdy. Arandatýshylyq sıpattaǵy anyq emes jáne jalǵan aqparat taratqany úshin Qazaqstan Respýblıkasynyń zańdaryna sáıkes jaýapkershilik kózdelgenin atap ótti.
