Mádenı is-sharanyń alǵy sózinde «Qazaqfılm» kınostýdııasynyń prezıdenti Aqan Sataev «Aqyn» fılminiń shyǵarmashylyq tobyn tusaýkesermen quttyqtap, kartınanyń alǵashqy kórsetilimi Tokıodaǵy halyqaralyq kınofestıval sheńberinde ótkenin jáne bul baıqaýda Dárejan О́mirbaev «Úzdik rejısser» júldesimen marapattalǵanyn atap ótti. Sonymen qatar Aqan Sataev atalǵan kınotýyndy jaqynda ǵana ótken Halyqaralyq Berlın kınofestvaliniń «Forým» baǵdarlamasynda kórsetilgenin eske salyp, fılmniń alar asýy áli alda ekenin aıtty.
Esterińizge sala ketsek, «Aqyn» fılmi tehnologııalar damyǵan qazirgi zamanda ónerdiń qoǵamda alatyn orny týraly oı qozǵap, poezııaǵa suranys azaıǵan dáýirde aqynnyń kúıinishi týraly syr shertedi. Qazaq halqynyń XIX ǵasyrdaǵy eń kórnekti aqyndarynyń biri Mahambet О́temisulynyń qıly taǵdyry jaıynda oıǵa batqan basty keıipker názik júrekti aqyndardyń ómiri qashan da qıyn bolǵanyn túsinedi.
«Nemis jazýshysy German Gesseniń «Avtorlyq kesh» atty áńgimesin oqyǵan soń fılmniń ssenarııin jazýǵa kiristim. Keıin qolyma qazaqtyń belgili aqyny Mahambet О́temisulynyń ómiri men ólimi týraly tyń derektermen tolyqtyrylǵan kitap tústi. Ony oqyp shyǵyp, fılmniń ssenarııine qostym. Osylaısha «Aqyn» fılm dúnıege keldi», dedi rejısser Dárejan О́mirbaev.
Fılmdegi basty róldi «Jigitter» tobynyń ánshisi Erdos Qanaev somdady. Belgili ánshi «Jigitter» kvartetine bıyl 20 jyl tolatynyn jáne osy ýaqyt aralyǵynda kórermendermen alǵash ret kınoakter retinde qaýyshyp otyrǵanyn aıtty.
«Basynda bul rólge basqa akter bekitilgen bolatyn. Keıin karantın kezinde kastıng-dırektor Erdos Qanaevtyń kandıdatýrasyn usyndy. Birneshe ret kameraǵa túsirip kórdik te, nátıjesinde Erdosty tańdadyq. Ony ánshi bolǵany úshin tańdaǵanymyz joq. Degenmen keıbir sahnalardy túsirgende onyń shyǵarmashylyqqa jaqyn bolǵany kómek boldy», dedi rejısser.
Sonymen qatar Dárejan О́mirbaev «Aqyn» fılmi aldaǵy ýaqytta basqa da halyqaralyq bedeldi kınofestıvalder sheńberinde kórsetiletinin habarlady.
Aıta ketsek, fılmniń túsirý jumystary 2020 jyly bastaldy. Negizgi túsirilim Almaty qalasy jáne Almaty oblysynda, sondaı-aq Atyraý oblysynda júrgizildi.
ALMATY
