Qoǵam bolǵan soń, sol qoǵamnyń turǵyndaryn tolǵandyratyn máseleler kóp-aq. Qazirgi kezde kópshilik úshin eń kúrdeli máseleniń biri baspana bolyp otyr. Áýlıeata óńirinde talaı jyldan beri baspananyń aýyrtpalyǵyn kórip kele jatqan turǵyndar jeterlik. Dese de, bul másele óńir turǵyndarynyń bas biriktirip, uıymshyldyq tanytýynyń arqasynda birtindep sheshilip keledi. Osydan eki jyl buryn Jambyl oblysynyń ákimi Berdibek Saparbaevtyń bastamasymen aımaqta «Asarlatyp úı salý» jobasy qolǵa alynǵan bolatyn. Az ýaqyttyń ishinde atalǵan joba oń nátıjesin berip, kóptegen azamat baspanaly boldy.
Jambyl óńirinde «Asarlatyp úı salý» jobasy bastalǵan jyly kópshiliktiń kómegimen 99 turǵyn úı salynǵan. Oblys ortalyǵy Taraz qalasynan bastap, aımaqtaǵy birqatar aýdan, aýyldar da atalǵan jobamen qamtyldy. «Kóp túkirse kól» demekshi, jergilikti azamattardyń biri qarajat, biri qurylys materıaldaryn berip, endi biri qol kómegin aıamaı, muqtaj jandardyń baspanaly bolýyna atsalysty. Al ótken jyly da bul jumys qarqyn alyp, 134 úı salynǵan. Onyń ishinde 15 úı Taraz qalasynan salynsa, 18 úı Baızaq aýdanynan, 15 úı Qordaı aýdanynan, 14 úı T.Rysqulov aýdanynan boı kótergen. Sondaı-aq bul qatarda Jambyl, Jýaly, Merki, Moıynqum, Shý, Talas jáne Sarysý aýdandary da bar. Iаǵnı óńirdegi on aýdan túgeldeı qamtylǵan. Baspanalardyń bári de ıelerine tabystaldy. Qonystoıyn toılap, qýanǵan qarapaıym turǵyndardyń bul bastamaǵa da, oǵan atsalysqan barsha azamattarǵa da alǵysy sheksiz. Ásirese, az qamtylǵan, áleýmettik jaǵdaıy tómen jáne kópbalaly baspanaǵa muqtaj otbasylar úshin bul erekshe joba boldy.
Baızaq aýdany, Mádimar aýylynyń turǵyny, tórt balanyń anasy Ǵalııa Qurmanova «Asarlatyp úı salý» jobasy aıasynda baspanaly bolǵan jandardyń biri. Bul úıdi salý úshin aýdan ákimdigi tarapynan 15 sotyq jer bólinipti. Az ýaqyttyń ishinde kóptiń kómegimen 4 bólmeli úı salynǵan. Sonymen qatar aýyl turǵyndary baspanaly bolǵan turǵynǵa qajetti jıhazdar men turmystyq-tehnıkalyq zattar alyp bergen. Al T.Rysqulov aýdany, Lýgovoı aýylynyń turǵyny Darııa Tólendibaeva da bul kúnde baspanaly bolǵan azamattardyń qatarynda. Erekshe kútimdi qajet etetin balanyń anasy 15 jyl boıy úısiz júripti. Tipti, aýyl ákimshiligi men aýyl azamattary otbasynyń jaǵdaıyn eskerip, úıdi jedel járdem kóliginiń kelýine yńǵaıly kósheden salǵan. Sol sııaqty, atalǵan joba aıasynda aýyl azamattary Jambyl aýdanynyń Ashybulaq aýylynan jergilikti turǵyn Názıra Qulmanovaǵa jalpy quny 9 mıllıon teńgege 4 bólmeli úı salyp beripti. Osy kúnge deıin alty balanyń anasy, «Altyn alqa» ıegeri Jýaly aýdany, Bılikól aýylynda sharýanyń malyn baǵyp kúneltip kelipti. Bul kúnde baspana taqsyretinen qutylǵan kópbalaly ana Názıra Qulmanova da qaıyrymdy jandarǵa alǵys aıtýda. Eń bastysy – baspanaly bolǵan ózge de turǵyndar bul jobanyń ári qaraı jalǵasýyn tileıdi. Áli de bolsa Jambyl óńirinde baspanaǵa muqtaj jandar kóp. Jyl saıyn «Asarlatyp úı salý» jobasy arqyly júzdegen otbasynyń máselesi sheshilse, bul da qarapaıym halyqqa jasalǵan qaıyrymdy istiń biri bolar edi. Bıyl da bul bastamaǵa kópshilik qoldaý bildirip otyr.
«Jumyla kótergen júk jeńil» degendeı, bıyl baspanaǵa muqtaj jandarǵa arnalyp taǵy da 134 úı salý josparlanýda. Oblys ákimi Berdibek Saparbaev óńirdegi qala jáne aýdan ákimderine jobany laıyqty júzege asyrýǵa, muqtaj jandardy baspanamen qamtýǵa tapsyrma berip otyr. Búginde bul jobany jalǵastyrý úshin aýdandar men aýyldarda tıisti jumystar qolǵa alynǵan. Bıyl da júzden astam jambyldyq azamattar jańa úıge kirip, qonystoıyn toılaıtyn bolady.
Jambyl oblysy
