Memleket basshysy bul meıram ejelden jaqsylyq pen jasampazdyqty dáripteıtin ulyq mereke ekenin atap ótti.
«Kún men tún teńelip, kúlli tabıǵat qaıta jańaratyn áz Naýryzdy qarsy alýǵa babalarymyz erekshe mán bergen. Jyl basyn - Ulystyń uly kúni dep ardaqtaǵan. Áz Naýryz - bereke-birliktiń, shynaıy janashyrlyqtyń jáne ózara qamqorlyqtyń meıramy. Men búgin Ulys kúnin ózderińizben birge qarsy alý úshin Almatyǵa arnaıy kelip otyrmyn. Almaty - Táýelsizdigimizdiń altyn besigi. Halqymyzǵa qaıta oralǵan Ulys toıyn merekeleý osy qasterli mekennen bastaldy. Almaty - qazaq eliniń rýhanı, mádenı jáne iskerlik ortalyǵy. Zııaly qaýymnyń, óner, bilim, ǵylym, bıznes salasynyń ókilderi osynda shoǵyrlanǵan», dedi Prezıdent.
Memleket basshysy Qazaqstan halqyn aldaǵy aýqymdy mindetterdi birlese iske asyrýǵa shaqyrdy.
«Bir el, bir halyq bolyp, jańa Qazaqstandy birge quraıyq. Aldymyzda turǵan aýqymdy mindetter bar, kóp jumys bar. Sondyqtan bárimiz birge bir el bolyp, osy mindetti atqaraıyq. Qurmetti jastar, birge bolaıyq, birge jumyla eńbek eteıik! Tuǵyry myǵym, birligi bekem elimiz jasaı bersin! Qazaqstanymyz jasaı bersin, máńgi bolsyn! Áz Naýryz qutty bolsyn! Barshańyzǵa amanshylyq tileımin!», dedi Qasym-Jomart Toqaev.
