О́tken kúnnen sabaq alýdy qajet dep esepteıtin Memleket basshysy bıylǵy qańtarda Qazaqstannyń ishki jáne syrtqy jaýlarynyń táýelsizdigimizge úlken qaýip-qater tóndirgenin ashyq aıtty. Beıbit sherýge shyqqandardy paıdalanyp, nıeti men maqsaty bólek adamdar elde tóńkeris jasaýdy kózdedi, birneshe qalada ǵımarattardy qıratyp, órtedi jáne kóptegen saýda ortalyǵyn tonady. Nebir arandatýshylyq áreketter jasady. Alaıda eldigimizge syzat túsken joq. Halqymyz myzǵymas birligi men yntymaǵyn saqtap qaldy.
Q.Toqaev bul Joldaýda keshendi jańǵyrtý baǵdarlamasyn usyndy. Ata Zańymyzǵa eleýli túzetýler engiziletin boldy. Sonyń ishinde laýazymdy tulǵalardyń óz quzyretin asyra paıdalanýǵa jol bermeý maqsatyndaǵy bastamasy halyqtyń kóńilinen shyǵyp otyr. Konstıtýsııanyń 40-babynyń 2-tarmaǵynda: «Respýblıkanyń Prezıdenti – halyq pen memlekettik bılik birliginiń, Konstıtýsııanyń myzǵymastyǵynyń, adam jáne azamat quqyqtary men bostandyqtarynyń nyshany ári kepili», dep jazylǵan.
Prezıdent óz qyzmeti kezinde tynysh ómirdi qamtamasyz etip, halyqtyń birdeı múmkindikke ıe bolýyna kepildik beretinin aıta kelip: «Prezıdenttiń jaqyn týystaryna saıası memlekettik qyzmetshi bolýǵa jáne kvazımemlekettik sektorda basshylyq laýazymdardy ıelenýge zań júzinde tyıym salynady», dedi Qasym-Jomart Toqaev. Bul barlyq deńgeıdegi basshylarǵa úlgi bolýǵa tıis.
Memleket basshysy óziniń bastamalary jurtshylyqtyń ótinishteri, sondaı-aq Parlament depýtattary, Konstıtýsııalyq keńes, Ortalyq saılaý komıssııasy, Joǵarǵy sot jáne bedeldi sarapshylardyń usynymdary negizinde qalyptastyrylǵanyn eskertip ótti. Sonymen qatar Ulttyq qoǵamdyq senim keńesinde kókeıkesti máseleler talqylanyp, ortaq tujyrymdar jasalǵanyn jetkizdi. Endi atalǵan keńestiń ornyna halyqtyq negizde Ulttyq quryltaı qurylatyn boldy. Ol elimizdegi eń ózekti máselelerdi sheshýdiń joldaryn qarastyryp, naqty usynystar beretin bolady.
Prezıdent kótergen ókildi bılik tarmaǵyn qaıta qurý da zaman talaby. Parlamenttiń qos palatasynyń quramy ózgeredi. Sonymen qatar qoǵamdaǵy róli nyǵaıa túsedi. Jurtshylyqtyń bılikke degen senimin nyǵaıtý maqsatynda jergilikti máslıhattardyń da ókilettigi artady. Bul óńirlerdiń saıası-ekonomıkalyq, áleýmettik damýyna oń yqpal etedi.
«Partııada joq azamattar Májiliske ǵana emes, jergilikti ókildi organdarǵa da saılana almaıtyn boldy. Muny ashyq moıyndaýymyz kerek. Sonyń saldarynan halyqtyń saılaý naýqanyna qyzyǵýshylyǵy kúrt tómendedi», dep qoǵamdaǵy oryn alǵan kemshilikterdi anyq kórsetken Memleket basshysy saılaý júıesin jetildirýdiń joldaryn atady. Saılaýshylardyń múddesi ulttyq jáne óńirlik deńgeıde tolyq kórinis tabýy úshin Májilistiń depýtattyq korpýsynyń 70 paıyzyn proporsıonaldyq, 30 paıyzyn majorıtarlyq tásilmen jasaqtaý kerektigin alǵa tartty. Qasym-Jomart Kemelulynyń bul usynysy da qazir halyqtan tolyq qoldaý taýyp otyr.
Barlyq partııany damytýdy usyndy. Bárine teń múmkindik berý maqsatynda tıisti zańdarǵa túzetý engiziledi. Osyǵan oraı jaýapty organdarǵa naqty tapsyrmalar berildi.
Abaı, Ulytaý jáne Jetisý dep atalatyn jańa úsh oblystyń qurylatyny otandastarymyzǵa erekshe qýanysh syılaǵan jańalyq boldy. Munyń bári sol óńirlerdi órkendetý úshin jasalyp otyrǵan qadam. Mundaı mysaldy Túrkistan oblysynyń ortalyǵy bolǵan Túrkistan qalasynan kórip otyrmyz. Sonymen qatar ishki kóshi-qon máselesin retteýdi kózdeıdi.
Búgingi tańda qarjy turaqtylyǵyn saqtaýdyń mańyzy zor. Osy rette Prezıdent daǵdarysty boldyrmaý úshin onyń aldyn alatyn qajetti is-sharalarǵa toqtaldy. Úkimettiń bul iste óte qyraǵylyq tanytyp, keshendi jumystardy júzege asyrýy tıis ekenin aıtty. О́ıtkeni ulttyq valıýtanyń qunsyzdanyp ketpeýi jáne ekonomıkalyq ósimniń saqtalýy – basty mindetterdiń biri.
Aldaǵy ýaqytta azyq-túlik ónimderiniń baǵasy sharyqtap ketse, ol da halyqqa aýyr tıedi. Kóktemde egin egý naýqany bastalady. Bul bizdiń Qazaqstan úshin mańyzdy kezeń. Soltústik oblystarda, ásirese Qostanaı óńirinde astyqtan mol ónim alyp kele jatqanymyz belgili. Memleket basshysy kóktemgi egin egý naýqanyn sapaly ótkizýge basa nazar aýdardy. Dıqan qaýymyn qajetti janar-jaǵarmaımen, tehnıkamen, tuqym jáne tyńaıtqyshpen qamtý isin jolǵa qoıǵanymyz abzal. Úkimet pen ákimdikterge osy jumystardy júıeli júrgizýdi tapsyrdy. Q.K.Toqaevtyń «fermerler qaýymdastyǵymen birlesip, agroónerkásip keshenin memlekettik qoldaý tásilderin qaıta qaraý kerek», degen sózi sharýa qojalyqtaryna úlken úmit syılap otyr.
О́ıtkeni astyq óndirý bir adamnyń ne sharýa qojalyǵynyń jeke isi emes. Astyq – eldiń baılyǵy, halyqtyń yryzdyǵy! Qazaqstanda egin jaqsy shyqsa, halyq eshteńeden taryqpaıtyny anyq. Astyǵy mol elde ashtyq bolmaıdy!
Bizdiń Prezıdentimiz el azamattarynyń erteń emes, búgin baqytty ómir súrgenin qalaıtynyn, ózi úshin eldiń amandyǵy men jerimizdiń tutastyǵynan asqan qundylyq joq ekenin málimdedi. О́sip-órkendegen Jańa Qazaqstandy qurýǵa kúsh salyp jatqan Memleket basshysynyń bastamalaryn tolyq qoldaımyz jáne keshendi baǵdarlamalardyń tolyq júzege asýy úshin barsha qazaqstandyqtar atsalysady degen senimdemin.
Toqtarbaı QADAMBAEV,
qoǵam qaıratkeri
Qostanaı
