Quldyraǵan, quryǵan óndiris oshaqtaryn qaıta-qaıta aıtyp, jazǵanmen maı túspes. Endigi kezekte Jańa Qazaqstan qurý jolyndaǵy shynaıy, halyq úshin tıimdi usynys-pikirlermen bólisip otyrǵanymyz jón shyǵar.
Kúni keshe semeılikterdiń tilegine qulaq túrgen Prezıdentimiz Qasym-Jomart Toqaev kezekti Joldaýynda Abaı oblysyn qurýdy usyndy. Ortalyǵy Semeı qalasy bolatyndyǵyn shegelep aıtty. Qudaı-aý, alań-eleń zamanda mundaı jaqsylyq bolady dep kútpegen edik. Shynyn aıtý kerek, bul jolǵy Joldaýdy uıyp, altyn ýaqytty qıyp tyńdadyq. Halyq senimi aqtaldy. Kómeskilenip, sónip bara jatqan semeılikterdiń qýanyshynda shek bolmady. Áleýmettik jelide tarap jatqan beınerolıkten kórgendeı, Prezıdent qýanyshty jańalyqty aıtqanda sener-senbesimizdi bilmeı abdyrap qaldyq. Bir-birimizge qarastyq. Qýanyshymyz qoınymyzǵa syımaı, bir-birimizben qushaqtastyq. Kózimizge qýanyshtyń ystyq jasy irkildi.
El durys túsinsin, kemeden aǵytylǵan qaıyqtaı, Shyǵystan bólinip bara jatqanymyzǵa «alaqaılaǵan» joqpyz. Semeıdiń tamyryna qan júgirip, turalap qalǵan tirshiliktiń qaıta jandanatynyna qýandyq. Áıtpese qazaqtyń qaı pushpaǵy bolsyn – óz jerimiz, óz elimiz.
Endigi kezekte bárimiz bir kisideı qart qalamyzdy qaıtsek damytamyz degen suraq tóńireginde oılanýymyz kerek. Bar júkti Prezıdentke artyp qoıýǵa bolmaıdy. О́zimiz áreket etýimiz kerek. Birinshiden, elge janashyr, jarqyn bolashaqqa jol bastaıtyndaı basshyny saılap alý kerek shyǵar. Sodan keıin ár sala mamandary óz oılaryn ortaǵa salyp, ony basshylyq tyńdasa deımiz. Anaý shuryq-tesik joldar jóndelip, qarańǵy kóshelerge jaryq tartylady. Ol sózsiz dep oılaımyn. Meniń oıymsha, et óndirisi, teri ıleý kombınaty qaıta iske qosylyp, aýyl sharýashylyǵyn damytýǵa qaıta bir serpin berilýi tıis.
Sonymen qatar Semeı – tanymdyq týrızmdi damytýǵa taptyrmas óńir. Jıdebaı, Qońyr áýlıeni aıtpaǵanda, qala ishinde qanshama tarıhı ǵımarat bar. Keshegi alashordashylardyń bas qosqan ǵımaraty, turǵan úılerine deıin saqtaýly. Atap aıtsaq, búginde Beıbitshilik araly dep júrgen jerimizdiń ózi tarıhqa tunyp tur. Odan beri Nevzorovtar mýzeıiniń qory qandaı baı?! Shoqan Ýálıhanovpen tonnyń ishki baýyndaı dos bolǵan F.Dostoevskııdiń mýzeı úıi tur. Abaıdyń ádebı-memorıaldyq mýzeıine at basyn bursańyz, hakimniń ómir jolymen tolyqtaı derlik tanysyp shyǵasyz. Tize bersek, kóp. Abaı kelip júrgen kitaphana ǵımaraty da osy mańda. Mine, baı tarıhymyzdyń biregeı bóligi Semeıde. Toqeterin aıtar bolsam, joǵaryda atap ótken tarıhı núktelerdiń bári bir aýmaqta ornalasqan. Aldaǵy ýaqytta týrıstik marshrýt jasap qoıyp, syrttan kelgen qonaqtardy alyp ótýge bolady. Bul degenimiz – shaharymyzǵa quıylatyn qarjy. Semeı serpilip, qonaqtar qalamyzǵa aǵylyp jatar kún alys emes dep oılaımyn. Sonymen qatar Abaı oblysy bolǵannan keıin «Abaı» ortalyǵy ashylýy kerek dep esepteımin.
Iá, semeılikter eńse tiktep, erteńgi kúnge nyq senimmen qaraıtyn ýaqyt jetti. Biz, Semeı qalasynyń turǵyndary, Jańa Qazaqstandy birge quramyz.
Mereı QART,
aqyn
