«Nur-Sultan áýejaıy, My car jáne Lexus avtosalondary, sondaı-aq «Han-Shatyr» jáne Mega Silk Way saýda ortalyqtarynyń elektron mekenjaıyna belgisiz bireýler jarylǵysh qurylǵylar qoıylǵany týraly qoqan-loqy jazylǵan hat joldaǵan. Bul týraly «102» arnasyna qońyraýlar tústi», delingen elordalyq polısııa departamentiniń habarlamasynda.
Qazir bul nysandardy qalanyń tótenshe jaǵdaılar qyzmeti tekserip jatyr. Adamdardy evakýasııalaý júrgizilgen.
Bul rette Qaraǵandyda saǵat 9.00-de «102» telefonyna Muqanov kóshesindegi halyqqa qyzmet kórsetý ortalyǵynyń ǵımaratyna jarylǵysh zat qoıylǵany týraly anonım habarlama kelip túsken.
«Qaraǵandy oblysy PD jedel kezekshisi barlyq shuǵyl qyzmetterdi jiberdi. HQKO ǵımaratynan 31 adam evakýasııalandy. Ony tekserý kezinde jarylǵysh zat tabylǵan joq», dedi qaraǵandylyq quqyq qorǵaý organdary ókilderi.
