Elimizde sý tasqyny kezeńine daıyndyq pen ótýdiń belsendi kezeńi bastaldy. «Qazgıdrometpen» birge Tótenshe jaǵdaılar mınıstrligi aqparat, boljam almasý jóninde jumys rejimine kóshti. Iý.Ilınniń aıtýynsha, naýryzdyń sońǵy onkúndiginde «Qazgıdromet» boljamy oryn alǵan oqıǵalarǵa tolyq sáıkes keldi. Máselen, elimizdiń kóp óńirinde daýyl turyp, tabıǵat tosyn minez kórsetti.
– Búgingi tańda bizde bar aqparat boıynsha ylǵal qorynyń jınaqtalý kólemi birqatar óńirde, eń aldymen Qaraǵandy oblysynda, Esil, Qalqutan ózenderinde, Aqmola oblysynyń Sileti, Aqtóbe oblysyndaǵy Qarǵalyda ortasha kópjyldyq kórsetkishten tómen. Al Aqmola oblysyndaǵy Jabaı, Shaǵalaly ózen arnalary, Batys Qazaqstan oblysyndaǵy Ýtva ózeni qalypty jaǵdaıda. Norma sheginen birshama joǵary dep Esil ózeniniń basseınin Aqmola oblysynyń Sergeev sý qoımasyna deıingi, tikeleı Soltústik Qazaqstan oblysy men Qaraǵandy óńiriniń Nura kóline deıingi aralyqty aıta alamyz. Qazirgi ýaqytta biz nóldik fazalardan kúndiz jáne túnde oń temperatýraǵa aýysýdy baıqaımyz. Demek, qar erý prosesi anaǵurlym belsendi bolady. Bul tıisinshe, ár oqıǵaǵa daıyn bolýdy qajet etedi, – dedi mınıstr.
Tótenshe jaǵdaılar mınıstrligi men sý resýrstary komıtetiniń baqylaýyndaǵy barlyq sý qoımalardyń tolymdylyǵy 50%-70%-dy quraıdy. Sonymen qatar ózenderdiń arnasynan asyp, bitelip qalmaýy, muz úıindileri paıda bolmaýy úshin muz jarý jumystary júrgizilip jatyr.
– Qazaqstan aýmaǵy arqyly ótken daýyldyń saldarynan birqatar aımaqta, ıaǵnı Qyzylorda, Almaty, Qaraǵandy oblystarynda, Balqash kólinde muz úıindileriniń paıda bolýyna sebep boldy. Sondaı-aq bul qubylys Qyzylorda oblysy aýmaǵynda birqatar jekemenshik demalys úılerin búldirdi. Baqytymyzǵa oraı, onda eshkim bolǵan joq. Sáıkesinshe, adamdardyń ómiri men densaýlyǵyna qaýip tóngen joq. Sondaı-aq Túrkistan, Jambyl, Almaty oblystarynyń taýly aımaqtarynda qardyń qalyń túskeni baıqalady. Aýa temperatýrasy kóterilgen kezde taýdaǵy ózenderdiń boıymen qarqyny qatty aǵys júrip, qar kóshkini bolýy múmkin ekenin aldyn ala eskertemiz. Sondyqtan aldaǵy demalys kúnderi taýly jerlerde turatyn azamattardan qar kóshkini aımaǵynda qalmas úshin taýǵa barýdan bas tartýlaryn suraımyz. Taýly jerlerge barýǵa qatysty da tıisti eskertýler men shekteýler bolady, – dedi vedomstvo basshysy.
Búginde túrli áleýmettik jelide el azamattary qar qursaýynda qalyp, zardap shekti degen syńaıda ártúrli málimet tarap jatyr. Alaıda mınıstr mundaı aqparattardyń shyndyqqa janaspaıtynyn jetkizdi.
– Úsip qalǵandar, qaıtys bolǵandar týraly ınternette taraǵan feık aqparattar shyndyqqa janaspaıdy. Qar qursaýynda jáne muz úıindileri saldarynan birde-bir adam zardap shekken joq. Jolda qalǵan azamattardy ýaqytsha ornalastyrý pýnktterine kóshirý, ornalastyrý máselesine qatysty kómek ýaqtyly kórsetildi. Tek, osy jol ýchaskelerindegi apatty jaǵdaıǵa baılanysty jol-kólik oqıǵasy saldarynan qaza tapqandar boldy. Jalpy, mereke kúnderi jáne keıingi ýaqyttarda ótkizý pýnktterinde 1 200-den astam avtokólik turyp qaldy. 1 myńnan astam adamdy biz ártúrli kólik quraldarynan evakýasııaladyq.
Máselen, jylytý pýnktterine jetkizdik, psıhologııalyq kómek te, jergilikti atqarýshy organdardan tamaqtandyrýdy uıymdastyrý boıynsha da ýaqtyly kómek kórsetildi. Tótenshe jaǵdaılar mınıstrliginiń bólimsheleri men aýmaqtyq bólimshelerde tikeleı ornalastyrylǵan shtabtardyń telefondaryna 230-dan astam qońyraý kelip tústi. 7 myńnan astam túrli aqparattyq-anyqtamalyq habarlamalar kelip tústi, dedi Tótenshe jaǵdaılar mınıstri Iý.Ilın.
