Jyl saıyn uıymdastyrylatyn aksııa bıyl tórt kún boıy ótkizilgen. 28-31 naýryz aralyǵynda belsendiler 64 ýnıversıtetke baryp, Qazaqstan boıynsha 20 myń stýdentke saýaldama júrgizdi. Jastar qanatynyń tóraǵasy Nurjan Jetpisbaevtyń aıtýynsha, aksııanyń basty sharty – adaldyq pen anonımdik.
«Men barlyq múddeli tulǵalardy osy is-sharaǵa qatysýǵa shaqyramyn. Tek birigip, biz ýnıversıtetterdegi sybaılas jemqorlyqty joıyp, otandyq bilim berý deńgeıin arttyrýǵa úles qosa alamyz», dedi ol aksııa bastalǵan kúni.
Belsendiler joǵary oqý oryndarynyń sany áldeqaıda kóp bolýy múmkin ekenin, biraq bári birdeı Taza Sessiya-ǵa qatysýǵa kelisimderin bermegenderi týraly aıtty.
«О́ńirlerde ýnıversıtetter men kolledjder sybaılas jemqorlyqqa toly. Bul stýdentter men oqytýshylar úshin ádettegi tájirıbe. «Sabaqta otyrǵyńyz kelmeıdi me? Shokolad alyp ber de, kete ber!». Eń ókinishtisi, stýdentterge bul jaǵdaı unaıdy», dedi aksııaǵa qatysýshylardyń biri.
Saýaldama júrgizýge táýelsiz baqylaý-
shylar, sonyń ishinde halyqaralyq grossmeıster Jansaıa Ábdimálik, bloger Almas Saǵynuly jáne ekstremaldy sportshy Sáken Kagarov, basqa da qoǵam qaıratkerleri, sondaı-aq jergilikti atqarýshy organdar janyndaǵy «Adaldyq alańy» jobalyq keńseleriniń ókilderi tartyldy.
Amanat partııasynyń jastar qanaty aksııanyń qorytyndysyn bıyl sáýir aıynyń sońynda jarııalaýdy josparlap otyr.
Esterińizge sala keteıik, Taza Sessiya aksııasy 8 jyldan beri ótkizilip keledi. Máselen, 2020 jyldyń nátıjeleri boıynsha suralǵandardyń 12,5%-y ózderi oqıtyn JOO-da sybaılas jemqorlyq faktileri bar ekenin málimdegen.
2020 jyly saýaldamaǵa 20 710 adam qatyssa, onyń 63,3 paıyzy – 2 jáne odan joǵary kýrs stýdentteri. Stýdentter sybaılas jemqorlyqpen kóbinese emtıhan tapsyrý kezinde betpe-bet kelgen. Bul týraly aksııaǵa qatysýshylardyń 23,8 paıyzy málimdedi. Sonymen qatar sol jylǵy reıtıngtiń antılıderi «Astana» medısına ýnıversıteti boldy. Qorytyndy boıynsha «paranyń ortasha mólsheri» de anyqtalǵan. Máselen, 400 myń teńgege stýdentterge aqyly oqý túrinen bıýdjettik oqý túrine aýysýdy, 260 myń teńgege áskerı kafedraǵa túsýdi, 150 myń teńgege dıplomdyq jumysty «óte jaqsy» etip qorǵaýdy, al sessııany 22 myń teńgege «avtomatpen» tapsyrýdy usynǵan. О́tken jyly aksııa ýnıversıtetterdiń qashyqtan oqytýǵa kóshýine baılanysty ótkizilmegen edi.
