Sonymen qatar alqaly jıyn aıasynda «Býyrqanǵan bula jyr» atty jınaqtyń tusaýkeser rásimi ótti. Jınaqqa sońǵy jyldary «Egemende» qyzmet etken jáne qyzmet etip júrgen jas aqyndardyń jyrlary toptastyrylǵan.
«Egemen Qazaqstan» gazetiniń Májilis zalynda ótken keleli jıynǵa Memlekettik syılyǵynyń laýreaty, belgili jazýshy Tólen Ábdik, Alataýdan arqaǵa jaqynda ǵana qonys tepken ardakúreń aqyn Ǵalym Jaılybaı, aqyn, QR Eńbek sińirgen qaıratkeri, Qazaqstan Jazýshylar odaǵynyń Nur-Sultan qalasy fılıalynyń dırektory Dáýletkereı Kápuly, QR Parlamenti Májilisiniń depýtaty, aqyn Maqpal Mysa, Halyqaralyq «Qazaq tili» qoǵamynyń vıse-prezıdenti, «AMANAT» partııasy saıası keńesi bıýrosynyń múshesi Maksım Rojın, Assambleıa múshesi Asker Pırıev, kúıshi, Qazaqstannyń eńbek sińirgen qaıratkeri, Qazaq ulttyq óner ýnıversıtetiniń professory Janǵalı Júzbaı jáne eldordalyq jas aqyndar qatysty.
Dóńgelek ústeldi «Egemen Qazaqstan» RG» AQ Basqarma tóraǵasy Darhan Qydyráli ózi júrgizip otyrdy.
«Bir baıqaǵanym sana óte baıaý qalyptasatyn qubylys. Keshegi keńestik kezeńde ósip, sonyń ıdeologııasymen ýlanǵan jandardyń sanasyn oıatý tipten qıynǵa tústi. Sondyqtan jańa Qazaqstandy Alash zııalylaryn janyna temirqazyq etken jastar qurady dep senemin. Jańa zamanǵa saı urpaq bolyńyzdar», dep aq batasyn berdi jazýshy Tólen Ábdik.
Al aqyn Ǵalym Jaılybaı: «Bul jańa úrdis eken. Bas basylymnyń janynan osyndaı shyǵarmashyl jastarǵa jol ashatyn antologııalyq jınaqtardyń shyǵyp turýy olardyń qalyptasýyna zor yqpal etedi», dep baǵalady.
О́z kezeginde sóz alǵan aqyn Dáýletkereı Kápuly búgingi kúnniń zııaly tulǵasy qandaı bolý kerek degen taqyrypta tereń oı órbitti. Bas basylymnyń kitaphanasyna Nur-Sultan qalasy ákimdiginiń qoldaýymen jáne Qazaqstan Jazýshylar odaǵy Nur-Sultan qalalyq fılıalynyń uıytqy bolýymen "Nur-Sultan kitaphanasy" serııasymen shyqqan elordalyq 30 jas qalamgerdiń jınaǵyn tartý etti.
Antologııalyq jyr jınaqqa óleńderi engen aqyndar arasynan aqyn, jazýshy, halyqaralyq «Rýh» ádebı baıqaýynyń jeńimpazy Ularbek Nurǵalymuly sóz alyp, oramdy oılarymen bólisti. Al bas basylymnyń talantty tilshileri, aqyn Raýan Qabıdoldın men Muhtar Kúmisbek óleń oqydy.
Aıta keteıik, atalǵan jınaqqa on jeti aqynnyń óleńi engen.
