Sońǵy jyldary súıekten sándik nemese geraldıkalyq buıym jasaý óneri aıtarlyqtaı damyp keledi. Osyndaı súıekten buıym jasaýshylardyń biri – astanalyq ustaz, Eýrazııa dızaınerler odaǵynyń múshesi – Asylbek Begzanuly. Bul azamat halqymyzdyń súıekten buıym jasaý dástúrin damytýmen qatar, elordalyq mektep oqýshylaryna atalǵan ónerdi úıretýde.
«Ertede el arasynda jaýyryn súıekke qarap bal ashatyndar bolǵanyn jaqsy bilemiz. О́ıtkeni bul súıek basqa múshelerge qaraǵanda, kompozısııalyq qurylymy men formalyq úılesimi keń ári adamnyń shyǵarmashylyq qııalyn ushtaıtyn mánge ıe. Desek te, súıekten buıym jasaý ońaı emes. Onyń ózindik aıla-tásili tehnologııasy bar. Sheberdiń qııaly men isi úıleskende ǵana tolyqqandy týyndy týary haq. Súıekten sulýlyq týdyrý – qaǵazǵa nemese mataǵa sýret salý emes», deıdi sheber.
Súıekshilik ónerimen aınalysqanyna onshaqty jyldyń júzi bolǵan sheber 2018 jyly eńbek páni ustazdary arasynda ótken qalalyq baıqaýda «Orman buǵysy» atty jumysymen bas júlde alsa, «Beıbitshilik qusy» atty týyndysy Túrkııada ótken halyqaralyq kórmede «Úzdik óner» nomınasııasyna ıe bolypty. Sondaı-aq ótken jyldary Abaıdyń 175 jáne ál-Farabıdiń 1150 jyldyǵyna oraı respýblıkalyq eńbek páni ustazdary arasynda uıymdastyrylǵan «Ǵasyr tolǵaýy» atty kórme kezinde, iriktelip alynyp, qurastyrylǵan «Babalar amanaty» atty albomǵa týyndylary jarııalanypty.
Qazirgi tańda sheber Nur-Sultan qalasyndaǵy Smaǵul Sádýaqasuly atyndaǵy № 78 mektep gımnazııasynda ustazdyq etýmen qatar, ulttyq muramyzdy dáriptep, sándik-qoldanbaly ónerdiń qyr-syryn bolashaq urpaqtyń sanasyna sińirip, aǵashtan, teriden, súıekten túrli buıymdar, kádesyılar jasaý isin shákirtterine úıretip júr.
