AQSh 6 sáýirde Reseıdiń eki banki – «Sberbank» pen «Alfa-Bank» AQ-ǵa qatysty sanksııalar aýqymyn keńeıtti. AQSh Qarjy mınıstrligi Sheteldik aktıvterdi baqylaý basqarmasynyń (OFAC) sheshimimen bul bankter jáne olardyń enshiles uıymdary, onyń ishinde Qazaqstanda ornalasqan uıymdary SDN (Specially Designated Nationals) tizimine engizilgen. Endi budan bylaı AQSh qarjylyq mekemelerin qosa alǵanda, AQSh ıeligindegi nemese AQSh tulǵalary baqylaýyndaǵy nemese AQSh ıýrısdıksııasy shegindegi barlyq menshik jáne menshiktegi múddeler buǵattalady.
Budan basqa, bir nemese birneshe buǵattalǵan adamǵa tikeleı nemese janama, jeke nemese jıyntyǵynda, 50 nemese odan kóp paıyzǵa tıesili kez kelgen adamnyń búkil múlki jáne múliktegi úlesteri de buǵattalady. Tıisinshe, AQSh tulǵalaryna, onyń ishinde AQSh qarjylyq mekemelerine, eger bul uıymdar OFAC-tan bosatylmasa nemese ýákilettik berilmese, olarmen operasııalar jasaýyna tyıym salynǵan.
OFAC Alfa-Bankpen 2022 jylǵy 6 mamyrǵa deıin, Sberbankpen 2022 jylǵy 13 sáýirge deıin mámileler aıaqtaý merzimin belgiledi. Demek osy eki banktiń klıentteri AQSh dollarymen tólem jáne aýdarym operasııalaryn jasaı almaıdy. Degenmen, ulttyq valıýta arqyly bank ishindegi operasııalardy eshqandaı shekteýsiz júzege asyra beredi. Osy oraıda Qarjy naryǵyn retteý jáne damytý agenttigi ahýalǵa oraı pikir bildirgen.
«Atap aıtqanda, Alfa-Bankke qatysty engizilgen sanksııalar birqatar ýaqytsha shekteýge ákeldi. Bank jeke jáne zańdy tulǵalar úshin AQSh dollaryndaǵy jáne eýrodaǵy aýdarymdardy toqtata turdy. Budan basqa, jeke jáne zańdy tulǵalar úshin bankomattar men POS termınaldardyń menshikti jelisinen tys Visa jáne MasterCard kartalarynyń jumysy toqtatyla turdy. Alfa-Bank ýaqytsha jeke jáne zańdy tulǵalar úshin qolma-qol aqsha alýǵa jáne aýdarym jasaýǵa lımıtter engizdi, kredıtter berýdi toqtatty. Alfa-Bankti qospaǵanda, basqa bankterdiń kartalarymen zańdy tulǵalar úshin POS-termınaldardaǵy tólemderdi qabyldaý toqtatyldy.
Bul rette klıentter bankomattardan qolma-qol aqsha alyp, jedel tólem júıesine (JTJ-ne) qatysýshy bankterge telefon nómiri boıynsha mobıldi qosymshadaǵy aqshany teńgemen jáne táýliktik lımıt sheginde basqa bankterge shot derektemelerin aýdara alady. Kommýnaldyq qyzmetter, uıaly baılanys jáne basqa da qyzmetter úshin tólemder táýliktik lımıt sheńberinde shtattyq rejimde ótedi. Jalpy alǵanda, Reseıdiń enshiles bankteri klıentter aldyndaǵy mindettemelerin ýaqtyly jáne tolyq kólemde oryndaıdy, onyń ishinde salymdarǵa, kredıtterge qyzmet kórsetý, sondaı-aq aqsha qarajatyn qabyldaý jáne berý bar. Bul bankter – depozıtterge mindetti kepildik berý júıesiniń qatysýshylary. Sondyqtan azamattar qarajatynyń saqtalýyna kepildik beredi», delingen habarlamada.
Agenttiktiń habarlaýynsha, Reseıdiń enshiles bankterine qatysty engizilgen sanksııalar men shekteýler Qazaqstan bankteriniń qyzmetine baılanysty emes jáne olarǵa áser etpeıdi.
«Qazaqstannyń bank sektory kapıtaldyń jáne ótimdiliktiń eleýli qoryna ıe – 16 trln teńge nemese aktıvterdiń 42,3 paıyzy. Mundaı áleýet bankterge aǵymdaǵy syrtqy ekonomıkalyq kúızelisterdi sińirýge múmkindik beredi. Bıyl jyl basynan beri bankterdiń jıyntyq aktıvteri 148 mlrd teńgege nemese 37,8 trln teńge kórsetkishine deıin 0,4 paıyzǵa ósti. Menshik kapıtaly 96 mlrd teńgege nemese 2,1 paıyzǵa ósip, 4,6 trln teńgeni qurady. Ekinshi deńgeıli bankter kapıtaly men ótimdiliginiń normatıvteri zańnamada belgilengen eń tómengi mánderden birneshe ese asyp túsedi. Bul bankterge shtattyq rejimde jumys isteýge jáne halyq pen korporatıvtik klıentter úshin úzdiksiz qyzmet kórsetýdi qamtamasyz etýge múmkindik beredi», deıdi agenttik ókilderi.
