Úkimet otyrysynan keıin jýrnalıster otandyq naryqtaǵy kólik tapshylyǵy týraly surady.
«Qazir reseılikter jappaı qazaqstandyq kólikterdi satyp alyp jatyr. Mysaly Qostanaıda kólik satý kólemi on esege ósti. Al sizder 4 prosenttik avtokredıt beremiz deısizder. Sonda aqsha bar, al kólik joq. Osyny qalaı sheshýge bolady?», dep surady tilshiler.
Mınıstrdiń aıtýynsha búginde avtokredıt alýǵa ótinim bergen qazaqstandyqtar onsyz da birneshe aı kútýge májbúr. Ondaı problema buǵan deıin bolǵan. Al reseılikter jappaı kólik satyp alsa, kezekte turý merzimi uzarýy kerek.
«Shynymen de siz durys másele kóterip jatyrsyz. Qazir satyp alýshy úsh-tórt aı kezek kútedi. Dál osy merzim ózgerse, onda tıisti shara qoldanamyz. Qazir jumysqa baryp, naqty tapsyrma beremin. Otandyq kólikterdi qazaqstandyqtar alatyndaı etip jasaýymyz kerek», dep atap ótti Q. О́skenbaev.
Aıta keteıik búgin Úkimet jeńildetilgen avtokredıt baǵdarlamasynyń negizgi sharttaryn bekitti. Olar:
Avtokredıtti ekinshi deńgeıli bankter beredi. Biraq baǵdarlamaǵa qatysatyn bankte elektrondy kezek bolýy kerek.
«Qarjylandyrýdyń ashyqtyǵyn qamtamasyz etý úshin mınıstrliktermen mindetti shart kózdelgen. Oǵan sáıkes ekinshi deńgeıli bankterde qaryz alýshylarǵa qarjylandyrýdy usynýdyń mártebesi men merzimin qadaǵalaıtyn avtomattandyrylǵan júıe bolýǵa tıis», deıdi mınıstrlik mamandary.
Sondaı-aq qaryz alýshyǵa eki jyldyń ishinde bir retten artyq avtokredıt alýǵa tyıym salynady.
