«2021 jyly el boıynsha qarjy pıramıdalarynyń qurbandary 31 myńnan astam azamat boldy, olarǵa 54 mlrd teńgeden astam somaǵa zalal keltirildi. Búgingi tańda ishki ister organdarynyń óndirisinde osy sanattaǵy 65 qylmystyq is tirkelgen, onda 3 myńnan astam jábirlenýshi bar», dedi IIM Tergeý departamentiniń bastyǵy Sanjar Ádilov.
Ol búgingi tańda qarjy pıramıdalary ózin joǵary tabysty ınvestısııalar salasyndaǵy tabysty uıymdar retinde kórsetip otyratynyn eske saldy.
О́zderiniń jarnamalyq kampanııalarynda olar «ınnovasııalyq joba», «joǵary tabysty bıznes», «biregeı», «asa tıimdi», «tabysqa kepildik beremiz» degen sózderdi paıdalanady.
Onyń aıtýynsha, alaıaqtar zańdy mıkroqarjylyq uıymdarmen, býkmekerlik keńselermen, tutyný kooperatıvteriniń tusynda jasyrynady. Qarjy pıramıdalaryn uıymdastyrýshylar áleýmettik jelilerde belsendi jumys júrgizip, onlaın-tabys nemese joǵary tabysty onlaın-jobany usynady, tanymal messendjerlerde chattar quryp, qatysýshylardy túrli utys oıyndarymen, saýalnamalarmen jáne basqa da marketıngtik amaldarmen tartady.
Tergeý departamentiniń basshysy qarjy pıramıdalaryna qarsy is-qımyl boıynsha polısııanyń qyzmeti qarjy monıtorıngi agenttigimen tyǵyz yntymaqtastyqta júzege asyrylatynyn eske saldy.
«Qabyldanǵan sharalar nátıjesinde, onyń ishinde saıttardy buǵattaý, uıymdastyrýshylardy, fılıaldardy, qurylymdyq bólimshelerdi ornatý boıynsha 180-nen astam qarjylyq ınvestısııalyq kompanııalar men fırmalardyń qyzmeti toqtatyldy. 2021 jáne 2022 jyldary 138 adam qylmystyq jaýapkershilikke tartyldy, olardyń 50-i sottaldy, qalǵandaryna qatysty sot talqylaýy júrip jatyr. Sotqa deıingi tergeý barysynda jalpy somasy 3 mlrd teńgeden asatyn aqsha qarajatyna, jyljymaly jáne jyljymaıtyn múlikke tyıym salyndy», dep túıindedi Sanjar Ádilov.
