Elordadaǵy Ulttyq mýzeıde Mádenıet jáne sport mınıstrligi Qoljazbalar jáne sırek kitaptar ulttyq ortalyǵymen birlesip uıymdastyrǵan kórmeniń ashylýyna Mádenıet jáne sport mınıstri Dáýren Abaev, Parlament Senaty men Májilisiniń depýtattary, Qazaqstandaǵy dıplomatııalyq mıssııalardyń basshylary men ókilderi (Ázerbaıjan, Qyrǵyzstan, Túrkııa, Iran), qoǵam, ǵylymı jáne saraptamalyq qaýymdastyq, arhıvter, kitaphanalar, mýzeılerdiń ókilderi qatysty.
Kórmege Qoljazbalar men sırek kitaptar ulttyq ortalyǵynyń qorlarynda saqtalǵan ejelgi jazba eskertkishter, qoljazbalar men sırek kitaptar qoıyldy. Atap aıtqanda, VII ǵasyrda jazylǵan qasıetti Quran Kárim, Qoja Ahmet Iаsaýı, Nasr ıbn Muhammed Samarqandı, Mahbýbı, Ibn Hallıkan jáne taǵy basqa avtorlardyń shyǵarmalary. Uly dalamyzda Qypshaq, Qarahan, Altyn Orda dáýirlerinde hatqa túsip, álem jaýharlarynyń altyn júlgesine aınalǵan bul kóne týyndylar qazaq halqynyń tól mádenıetine jatatyn sırek qoljazbalar ekenin tanytý búgingideı jahandaný kezinde óte mańyzdy.
«Kóne jazba muralar tól mádenıetimiz ben tarıhymyzdy álemge áıgilep qana qoımaı, kópshilikke dáripteıdi. Ult rýhanııatyn odan ári nyǵaıtyp, jas urpaqtyń tarıhı sanasy tereńdeýine jol ashady. Osy rette biz Ulttyq mýzeıde qoljazbalar jáne sırek kitaptar ulttyq ortalyǵyndaǵy biregeı jazba derekterden arnaıy kórme uıymdastyryp otyrmyz. Maqsat – tarıhı muralardy keleshekpen baılanystyrý, elimizdiń sanǵasyrlyq tarıhyn aıqyndaıtyn baǵa jetpes muralaryn tanytý. Sonymen qatar ol dúnıelerdi ǵylymı aınalymǵa qosyp, ǵalymdar men zertteýshiler úshin qoljetimdi etý óte mańyzdy. Kórmede el tarıhyna qatysty birneshe mańyzdy jazba qoıylǵan», dedi Mádenıet jáne sport mınıstri Dáýren Abaev kórmeniń ashylý saltanatynda.
Qadym zamandardan syr shertip qana qoımaı, tereń parasat, paıymnyń ozyq úlgilerin usynatyn qoljazbalyq jádigerler ultymyzdyń rýhanı, saıası, mádenı jáne tarıhı eskertkishteriniń qatarynan sanalady. Ulttyq mádenıetke ǵana emes, álemdik aqyl-oıdyń damýyna olja salǵan kóne muralar ǵylymnyń, bilimniń jáne mádenıettiń damýyna úlken áser etedi. Osy maqsatty kózdegen kórme barysynda tarıhı qoljazbalardy kópshilikke taratý baǵytynda jumys júrgiziledi. Nátıjesinde, jas ǵalymdarǵa bastapqy derekkózdermen jumys isteý múmkindigi týyp otyr.
«Mundaǵy Altyn Orda dáýiri ádebıetine jatatyn Sáıf Saraı men Qutybty qazaq jazba ádebıetiniń negizin qalaýshy retinde tanýǵa bolady. О́ıtkeni Qutybtyń «Husyraý-Shyryny» nemese Sáıf Saraı eńbekteri shaǵataısha qypshaq tiliniń negizinde jazylǵan», deıdi Qoljazbalar jáne sırek kitaptar ulttyq ortalyǵynyń bas sarapshysy Almat Ábsalyqov.
«Uly dala tarıhynyń jazba muralary» atty kórmege Qaıyp hannyń túrik sultany II Ahmedke jazǵan hatynan úzindi, sultan Kenesary, Jáńgir han, Abylaı hannyń hattary jáne taǵy basqa qundy jádigerler qoıylǵan. Ulttyq mýzeıdegi kórmeni elorda jurtshylyǵy jyl sońyna deıin tamashalaı alady.
