Aımaqtar • 18 Sáýir, 2022

Jol azabyn júrgen biledi

45 ret kórsetildi

Qazirgi kezde Taraz qalasyndaǵy jańadan salynǵan turǵyn úılerge aıtylatyn syn kóp. Jyl saıyn el ıgiligi úshin júzdegen páter paıdalanýǵa beriledi. Biraq kóptegen úıdiń sapasy syn kótermeıtini talaı ret sóz bolǵan. Endi biraz ýaqyttan beri kóptiń synyna ushyrap kele jatqan jańa 15-shaǵyn aýdandaǵy jol máselesi de bul kúnde turǵyndar úshin túıtkildi máselege aınalǵan. Shyn máninde atalǵan shaǵyn aýdan boı kótere bastaǵanda kóptiń qýanyshynda shek bolǵan joq. Baspanaly bolýdan úmiti bar talaı otbasy az ýaqyttyń ishinde qonystoıyn toılady. Memleket bergen jeńildikti paıdalanyp baspanaly boldy. Biraq talaı jyl tabanaqy, mańdaı terimen tapqan-taıanǵanyn bankke quıyp, áýpirimdep júrip úı alǵan áleýmettiń de bazynasy oryndy. Olardyń áli de tóleıtin qaryzy kóp. Al kópshilik mundaı kókeıkesti máseleni talaı márte kótergenimen, áli de ońdy nátıje bolmaı tur.

Bul kúnde Taraz qalasynda qurylys jumystary qarqyndy júrgizilýde. Birqatar nysan salynyp, birtalaı kóshe jóndelgen. Alaıda taǵy da osy 15-shaǵyn aýdannyń qarapaıym turǵyndary «Aspannan kıiz jaýsa da, qulǵa ultaraq buıyrmaıdynyń» kebin kıip keledi. Atalǵan shaǵyn aýdannyń turǵyny Gúlmıra Kórkemǵalıqyzynyń aıtýynsha, mundaǵy joldyń jaǵdaıy kóptiń sabyryn sarqyp, tózimin taýysqan. «2019 jyly naýryz aıynda osy shaǵyn aýdandaǵy №11 úıge kóship keldik. Sodan beri joldyń azabyn tartyp kelemiz. Tıisti mekeme mamandaryna joldyń jaıyn aıtsaq, shaǵyn aýdannyń qurylysy tolyq aıaqtalǵan soń baryp salynatynyn aıtyp shyǵaryp salady. Sonda mundaǵy qurylys jumystary qashan aıaqtalady? Dál qazirgideı qarqynmen joldyń jýyq ýaqytta aıaqtalmaıtyny, talaı jylǵa sozylatyny anyq», deıdi ol.

Kópshilik úshin kúrdeli máselege aınalǵan joldyń jaǵdaıy shynynda da qıyn. Eldiń báriniń áleýmettik jaǵdaıy birdeı emes. Ásirese, jeke kólikpen emes, qoǵamdyq kólikpen jú­rý­shi­lerdiń qatary kóp. Biraq eni tar kósheler taǵy da sol qoǵamdyq kóliktiń emin-erkin júrýine aıtarlyqtaı kedergi keltiredi. «Ásirese №36 marshrýttyń joly bárimizdi qajytyp jiberdi. Kóshek batyr jáne Chernyshov kóshesi arqyly júretin №36 marshrýt 15-shaǵyn aýdannyń ishine deıin kirmese de bir qaptaly arqyly júrip, keri qaıtady. Al endi avtobýs Kóshek batyr nemese Chernyshov kóshesi arqyly kelip, osy shaǵyn aýdanǵa burylǵannan bastap nashar jolǵa túsedi. Qatelespesem, joldyń uzyndyǵy – 500-600 metr. Munyń jol degen tek aty ǵana. Avtobýs emes, velosıpedpen de júrý múmkin emes. Avtobýs júrgizýshileri de joldyń jaǵdaıyna kúıinedi», deıdi turǵyn Gúlmıra Kórkemǵalıqyzy.

Rasynda, joldyń qurǵaq kezinde júrýdiń ózi muń bolady. Al jańbyr jaýǵan kezde kóshelerde shaǵyn kólshikter paıda bolyp, jaǵdaı tipti qıyndaı túsedi. Jalpy, jergilikti turǵyndardyń ýáji – jol máselesi. Aty da, zaty da jańa aýdannyń jol jaǵdaıy kelispeı tur. Kóptiń bazynasyna 15-shaǵyn aýdan, №7 úıdiń turǵyny Edil Besterek te ún qosyp, kópshiliktiń kóterip kele jatqan máselesiniń oryndy ekenin jetkizdi.

«О́tken jyly aýdanymyzdyń bir jaq qaptalyna asfalt tóselip, Pýsh­kın kóshesine qosyldy. Biraq №36 mar­shrýttyń joly sol kúıinshe qala berdi. Bar bolǵany 500-600 metrdeı ǵana jolǵa asfalt tóseý úlken qıyndyq týdyrmaıdy dep oılaımyn. Tipti, Kóshek batyr kóshesine deıin asfalt tóselse nur ústine nur bolar edi. Naý­ryz aıynyń basynan bastap jańbyr birneshe apta boıy tolassyz jaýdy. Jań­byrdan keıin joldyń jaǵdaıy tipti nasharlap ketti. Avtobýs júre almaı qaldy. Jolǵa jaýapty mamandar №36 marshrýtqa minip, shuryq tesik jolmen júrip kórse bizdiń jaǵdaıymyzdy túsiner edi», deıdi ol.

Qoǵamdyq kólik júrgizýshileri de bul joldarmen amaldyń joqtyǵynan júrgenin, kólikteriniń de qırap bite bastaǵan, alaıda osy jumys arqyly jan baǵyp otyrǵan soń basshylyq mindettegen jolmen júrý kerektigin aıtty. Sol sııaqty, Nursultan Baqyt­uly, Maral Shahtybaıqyzy sııaqty turǵyndar da jol máselesin aıtýda.

Jalpy, 15-shaǵyn aýdan turǵyndary­nyń bul bazynasy jergilikti bılikke jetpeı keledi. Turǵyndar jyl saıyn sheshilmeı kele jatqan máseleniń bıyl oń sheshimin tabady dep úmittengen. Máselen, kezinde atalǵan shaǵyn aýdanǵa qoǵamdyq kóliktiń qatynamaıtyny týraly jıi jazyldy. Aıtylǵan synnan oń qorytyndy shyǵarǵan Taraz qalasynyń ákimdigi birqatar baǵyttaǵy qoǵamdyq kólikti osynda burdy. Endi kópshilik qoǵamdyq kóliktiń ıgiligin kóremiz be degende, jol máselesi taǵy da shyǵyp tur. Jergilikti turǵyndardyń kópshiligi negizi №36 baǵyttaǵy qoǵamdyq kóliktiń shaǵyn aýdan turǵyndaryna óte yńǵaıly ekenin, jolaýshylar kóp minetinin aıtady. Sebebi, bul marshrýt kópshilik jıi baratyn «Aýyl-Bereke» bazaryna, birneshe shaǵyn aýdandarǵa jáne temirjol beketine deıin qatynaıdy. Munda qoǵamdyq kólikter ǵana emes, jeke kólikter de kóp júredi. Bi­raq bári de tolqynda terbelgendeı áreń qozǵalady. Sebep – taǵy da jol­dyń nasharlyǵy. Sondyqtan da turǵyndar Kóshek batyr kóshesine deıin asfalt, tipti bolmasa shaǵal tas tóselse eken degen tilegin jetkizdi. Turǵyndardyń ýájine Taraz qalalyq turǵyn úı-kommýnaldyq sha­rýa­shylyq, jolaýshylar kóligi jáne avtomobıl joldary bólimi basshysynyń mindetin atqarýshy Maqsat Nurjanov jaýap berip, bul másele bıyl sheshimin tabatynyn aıtty.

«Qazirgi tańda 15-shaǵyn aýdanǵa Kóshek batyr kóshesi arqyly kiretin jol bolashaqta eni 26 metr bolatyn úlken dańǵyl bolady. Keıingi kezde atalǵan jolǵa baılanysty turǵyndar tarapynan kóp shaǵym túsýde. Sondyqtan kólik qatynasyna qıyndyq keltirmes úshin ýaqytsha jol salynady. Joldyń uzaqtyǵy 487 metr, eni 9 metr bolady. Jobasyn daıyndap, tapsyrys berip qoıdyq. Odan bólek, shaǵyn aýdan turǵyndary qoǵamdyq kólikterdiń júrý jıiligine baılanysty kóp shaǵym aıtady. Búginde bul jerge úsh baǵyttaǵy avtobýs qatynaýda. Turǵyndardyń talap-tilegin eskere otyryp aldaǵy ýaqytta taǵy da eki marshrýt qosyp, jalpy sanyn beseýge jetkizemiz», deıdi M.Nurjanov.

Jaýapty basshynyń bul aıtylǵan sózi oryndalatyn bolsa, onda kópshilik úshin kúrdeli bolǵan jol máselesi de oń sheshimin tabady. Degenmen, jańa shaǵyn aýdandaǵy keıbir kúrdeli máseleler boıynsha tıisti sheshimder qabyldanyp, kemshilikter joıylatyn da ýaqyt kelgen sııaqty.

Boı kótergeli beri basynan daý aryl­maǵan 15-shaǵyn aýdandaǵy máse­le­­lerge núkte qoıatyn kez jetti. Búginde talaı turǵyn baspanaly bolyp, osynda ǵumyr keship keledi. Kópshilik tilegine oraı, kóne shahardaǵy bul kúrdeli másele oń sheshimin tapsa degen oı bar.

 

Jambyl oblysy

Sońǵy jańalyqtar

Shabyt shaqyratyn shahar

Elorda • Keshe

Aqjaınaq astana

Elorda • Keshe

Ozyq óndiris ornynda boldy

Aımaqtar • Keshe

Dımash pen Djekson

О́ner • Keshe

Uqsas jańalyqtar