Pavlodarda kıik kóp degen áńgime kópshilikke tańsyq bolýy múmkin. Shynymen de, basqa óńirlerden aýyp kelmese, jıi kózge kórinbeıtin janýar ǵoı. Qaıbir jyly pavlodarlyqtar Semeı jaqtan adasyp kelgen túıeni tirideı kórýge asyǵyp, alys-jaqynnan arbalap edi. Esektiń ózin kórse, máre-sáre kúı keshetini ras. Qazir kıikti jolyqtyrsa, tańǵalmaıtyn bolǵan. Janýardy oblystyń barlyq aýmaǵynda kezdestire almaısyz. Aqsý qalasynyń aýyldyq aımaǵyn, Baıanaýyl jáne Maı aýdandaryn meken etedi.
Bul janýardy qazaq aqbóken dep te ataıdy. Oǵan Sáken Seıfýllınniń «Kıikti qazaq jáne deıdi bóken, betpaqty baıǵus bóken qylǵan meken», dep jyrlaǵany dálel. Oblystyq orman sharýashylyǵy jáne janýarlar dúnıesi aýmaqtyq ınspeksııasynyń basshysy Rýslan Tólepbaevtyń aıtýynsha, óńirde 15 sáýirden bastap bir aıǵa sozylatyn «Aqbóken» aksııasy bastaý alǵan.
«Sharanyń maqsaty – aqbóken popýlıasııasyn saqtap, brakonerlikpen kúres boıynsha jumysty kúsheıtý. Kıikti zańsyz aýlaǵandarǵa jaza qatal. Janýardyń erkegin atqany úshin 500 AEK, al analyq kıik pen tólin aýlaǵany úshin 350 AEK kólemindegi aıyppul arqalaýy múmkin», deıdi R.Tólepbaev.
Aksııaǵa oblystyq orman sharýashylyǵy jáne janýarlar dúnıesi aýmaqtyq ınspeksııasy, «Ohotzooprom» kásipornynyń ınspektorlyq quramy jáne quqyq qorǵaý organdarynyń qyzmetkerleri jumyldyrylǵan.
Esterińizge salsaq, bıyl qańtar aıynda Baıanaýyl aýdanynda elik pen sileýsinge zańsyz ańshylyq jasaǵan bir fakt tirkelgen-di. Qazirgi tańda atalǵan faktige qatysty tergeý júrgizilýde. Osy oraıda baqylaý jumystaryn kúsheıtý artyq etpes.
Baqylaý demekshi, oblysta 2017 jyldan bastap «Ohotzooprom» mekemesine qarasty Baıanaýyl tirek beketiniń ınspektorlary janýarlardy qorǵaý boıynsha mańyzdy mıssııany múltiksiz atqaryp keledi. Nátıjesinde, óńirde arqarlardyń sany da artýda. Sońǵy jyldary birdi-ekili oqıǵa bolmasa, aımaǵymyzda zań buzýshylar joqtyń qasy. Orman sharýashylyǵy jáne janýarlar dúnıesi komıtetiniń 2023 jylǵa deıin ǵylymı maqsattardan basqa kıikterdi atýǵa tyıym salý týraly buıryǵy shyǵyp, moratorıı engizilgeni belgili. Kıikterdi zańsyz aýlaý úshin jaýapkershilikti kúsheıtý maqsatyndaǵy shara da oń nátıjesin berip otyrǵanyn atap ótken jón.
Pavlodar oblysy
