Gazetimizdiń áleýmettik jelilerdegi paraqshasynda ótken lotereıa kezinde batysqazaqstandyq 5 oqyrmanymyz da túrli júldege ıe boldy. Aıta keterligi, bul saıysqa gazetimizge tolyq jazylǵan oqyrmandarymyz avtomatty túrde, «Qazposhta» bergen tizim boıynsha qatysqan edi.
Baıqaýdyń eń baǵaly júldesi – uıaly telefon Alǵabas aýylynda turatyn Qosheter Ájımov esimdi oqyrmanymyzǵa jol tartty. Alǵabas – byltyr «Egemen Qazaqstan» gazetine eń kóp – myń danadan asa jazylǵan Batys Qazaqstan oblysy Aqjaıyq aýdanyndaǵy eldi meken.
Taǵy bir baǵaly syılyq – «Egemen Qazaqstan» jáne «Kazahstanskaıa pravda» gazetteriniń ataýy jazylǵan qabyrǵa saǵatyn óńirge belgili azamat, Batys Qazaqstan oblysy Jumyspen qamtýdy úılestirý jáne áleýmettik baǵdarlamalar basqarmasynyń basshysy Albert Esalıev utyp aldy.
Albert Temirbolatuly byltyr merzimdi basylymdarǵa jazylý maýsymy kezinde Qaztalov aýdanynyń ákimi bolatyn. Mamandyǵy tarıhshy, eńbek jolyn aýyl muǵalimi qyzmetinen bastaǵan ol memlekettik gazet-jýrnaldardyń baıyrǵy oqyrmany ekenin aıtady. Sonyń ishinde «Egemen Qazaqstan» gazetin turaqty jazdyryp oqyp kele jatqanyna 20 jyldan asqan. «Memlekettiń ustanymy, Úkimettiń áleýmettik-ekonomıkalyq damý baǵyty kórinis tabatyn el gazetin árbir memlekettik qyzmetshi jazdyryp alýǵa tıis», deıdi ol. Aıta keteıik, osyndaı oń kózqarastyń nátıjesinde byltyr Qaztalov aýdanynda 800-den astam adam gazetke jazylǵan bolatyn.
«Qazposhta» AQ Batys Qazaqstan oblystyq fılıalynyń jetekshisi Dınara Hasanǵalıeva oqyrmandaryna baǵaly syılyq taratyp, halyqty merzimdi basylymǵa jazylýǵa yntalandyryp otyrǵan «Egemen Qazaqstan» aksıonerlik qoǵamyna shynaıy alǵys aıtty.
«Ásirese syılyqtyń basym bóligine qarapaıym aýyl turǵyndary ıe bolǵanyna qatty qýandyq», deıdi Dınara Rysqalıqyzy.
Gazet-jýrnalǵa jazylý naýqanyn uıymshyldyqpen ótkizgen poshta qyzmetkerlerine de «Egemen Qazaqstan» serııasymen shyqqan kitaptar syıǵa berildi. Sonyń ishinde Taıpaq aýyldyq poshta bólimshesinen 30 jáne odan da kóp dana «Egemen Qazaqstan» gazetine jazdyrýdy uıymdastyrǵany úshin K.Muzafarǵa «Júz jyldyq jylnama» bestomdyǵy, 25 adamdy gazetke jazdyrǵany úshin Oral qalalyq poshta qyzmetkeri Tolqyn Kerimova Ábish Kekilbaıdyń «Dáýir daýysy» jınaǵy, 15 adamǵa jazylýdy uıymdastyrǵan Aqjaıyq aýdany Shabdarjap aýyldyq poshta bólimi qyzmetkeri R.Salamatova «Jıyrma bes jyl: jeńister men jemister» atty kitapqa ıe boldy.
«Qazposhta» AQ Batys Qazaqstan oblystyq fılıaly arqyly batysqazaqstandyq oqyrmandar bıylǵy alǵashqy jartyjyldyqta 61 319 túrli gazet-jýrnal jazdyryp alady eken. Dál qazir ekinshi jartyjyldyqqa da jazylý naýqany bastaldy. Súıikti oqyrmandarymyzdy bolashaqta da bizben birge bolýǵa shaqyramyz.
Batys Qazaqstan oblysy
