Búginde elordada 18 ardager turady, olardyń eń úlkeni – 102 jasta, eń kishisi – 96 jasta. 9 mamyrda Jeńis kúnin merekeleýge olar 1 mln teńge (1 013 060 teńge) mólsherinde birjolǵy tólem alady.
Jeńildikter boıynsha II Dúnıejúzilik soǵysynyń ardagerlerine teńestirilgender, ChAES qatysýshylary men múgedekterinen basqalary 111 300 teńgeden alady. Barlyǵy 410 adam, onyń ishinde – II Dúnıejúzilik soǵys kezinde qyzmet etken áskerı qyzmetshiler, fashıstik Germanııaǵa qarsy urys qımyldaryna qatysqan adamdar, Lenıngradta blokada kezeńinde jumys istegen azamattar, konslagerlerdiń kámeletke tolmaǵan tutqyndary, jaralanýy saldarynan múgedek bolǵan áskerı qyzmetshiler.
Basqa memleketter aýmaǵyndaǵy urys qımyldarynyń ardagerleri (Aýǵanstandaǵy urys qımyldarynyń ardagerlerinen basqa) – Tájik-Aýǵan ýchaskesinde mindetterdi oryndaǵan, Iraktaǵy halyqaralyq bitimgerlik operasııaǵa qatysqan, Taýly Qarabaqtaǵy etnosaralyq qaqtyǵysty retteýge qatysqan áskerı qyzmetshilerge – 63 600 teńge mólsherinde tólemder kózdelgen. Elordada osy tizimge jatatyn 810 adam bar.
Tyl eńbekkerleri (1946 adam), qaza tapqan áskerı qyzmetshilerdiń otbasylary, UOS qaıtys bolǵan múgedeginiń jubaıy (zaıyby), ChAES qatysýshylary qataryndaǵy oqshaýlaý aımaǵynan evakýasııalanǵan (óz erkimen ketken) adamdar 9 mamyrǵa deıin 34 980 teńgeden alady. Barlyǵy – 2 686 adam.
Aıta keteıik, ardagerler tólemderdi erteńnen bastap ala bastaıdy.
Sonymen qatar jergilikti bıýdjet esebinen Uly Otan soǵysy ardagerlerine kelesi tegin qyzmetter kórsetiledi:
– kommýnaldyq qyzmetter úshin aqshalaı ótemaqy, ol páter alańyna baılanysty aı saıyn 5-ten 8 AEK-ke deıin bólinedi;
– dári-dármekpen qamtamasyz etý;
– merzimdi basylymdarǵa jazylýǵa, monshalarǵa, shashtarazdarǵa barýǵa áleýmettik kómek (jyl basynda jeke shottarǵa 6,5 AEK aýdarylady);
– sanatorlyq-kýrorttyq emdeý qyzmetteri;
– qalalyq jolaýshylar kóliginde jeńildikpen júrý;
– tis protezdeý qyzmetteri.
