Kúsh atasyn tanymas
Qyzylordada aýyr atletıkadan erler men áıelder arasyndaǵy Qazaqstan chempıonaty óz máresine jetti. Jarystyń sońǵy kúni tómendegideı nátıjeler tirkeldi.
81 kılo salmaqtaǵy almatylyq Elaman Seıitqazynyń asqan sheberligine tánti boldyq. Ulttyq qurama sapyna byltyr ǵana ilikken jas óren qossaıystyń qorytyndysy boıynsha 341 (150+191) kılolyq ziltemirdi tik kóterip, bas júldeni oljalady. Rıo Olımpıadasynyń qola júldegeri, Dúnıejúzilik Ýnıversıada men Azııa chempıonatynyń jeńimpazy, óskemendik Denıs Ýlanov kúmis medaldy qanaǵat tutty. Qandasymyz ataqty qarsylasynan 39 kılo artyq salmaqty eńserdi. +109 kılo salmaq dárejesinde kúsh synasqan ziltemirshiler arasyndaǵy báseke óte shıelenisti ótti. Bas júlde úshin tartys Shyǵys Qazaqstan oblysynyń ókili Dmıtrıı Kaplın men shymkenttik Ibragım Bersanov arasynda órbidi. Ekeýi de halyqaralyq dárejedegi sport sheberleri. Bul aıqasta alǵashqysynyń asyǵy alshysynan tústi. Kaplın 365 (162+203) kılolyq kórsetkishke qol jetkizse, Bersanov odan bir kılo kem kóterdi.
Sondaı-aq jarystyń sońǵy kúni taldyqorǵandyq Sergeı Petrovıch (89 kılo), atyraýlyq Nurǵısa Ádiletuly (96 kılo) jáne qaraǵandylyq Kırıll Staroverkın (102 kılo) men Artem Antropov (109 kılo) jeńis tuǵyrynyń eń bıik satysyna kóterildi.
UFC-de kúsh synasady
Aralas jekpe-jek álemindegi eń beldi uıym – UFC taǵy bir qazaq sportshysymen tolyǵady. 11 maýsymda Sıngapýrde ótetin jarysta Maqsat Qaısar oktagonǵa shyǵady.
Qytaıda týyp-ósken qandasymyz byltyr Dana White’s Contender Series týrnırinde qyraǵy mamandardyń nazaryna ilikti. Ol kanadalyq Ahıles Estremadýrany utqannan keıin birden kópshiliktiń qoshemetine bólendi. Tipti UFS-diń qojaıyny Dana Ýaıttyń ózi: «Bul jigittiń qaısarlyǵy men jankeshtiligine tánti boldym. Báseke barysynda birneshe aýyr soqqy alsa da bylq etken joq. Kerisinshe, ózine degen senimdiligin joǵaltpaı, sońyna deıin aıanbaı aıqasty. Ol nebári 21 jasta. Ádette biz UFS-ge tym jas sportshylardy qabyldaı bermeımiz. Biraq bul áńgimeniń Qaısarǵa esh qatysy joq. Ondaı jaýjúrek jigitter bizge kerek», dep aqtaryla sóılegen edi.
Kúni búginge deıin Maqsat Qaısar jeti jekpe-jek ótkizip, sonyń altaýynda jeńiske jetti. UFS-degi óziniń tusaýkeser kezdesýin ol amerıkalyq Stıv Garsııamen (12-4) ótkizedi. Al Sıngapýrdegi jarystyń basty básekesinde jartylaı aýyr salmaqtaǵy brazılııalyq Glover Teısheıra (40-7) men chehııalyq Irjı Prohazka (32-3-1) aıqasady.
D tobynda oınaıdy
Úndistannyń astanasy – Nıý-Delıde 14 jasqa deıingi tennısshiler arasyndaǵy álem chempıonatynyń Azııa jáne Tynyq muhıt aımaǵy boıynsha irikteý týrnıri bastaldy.
Qazaqstan quramasy D tobynda óner kórsetýde. Bizdiń jas órender ózderiniń tusaýkeser kezdesýin Indonezııamen ótkizdi. Odan keıin Shrı-Lanka jáne Pákistanmen kúsh synasady. Osy topta tek úzdik shyqqan komanda ǵana irikteý týrnıriniń kelesi kezeńine ótedi. Jerlesterimiz bul jospardy oıdaǵydaı júzege asyrady degen oıdamyz. Sebebi qarsylastarymyz anaý aıtqandaı asa azýly emes. Olarǵa qaraǵanda Qazaq eliniń quramasynyń qarqyny áldeqaıda kúshti. Bizdiń komanda sapynda Zańǵar Nurlanulyn aıryqsha atap ótýge bolady. Ol jasóspirimder arasynda Tennis Europe (TE) reıtınginde jeke-dara kósh bastap tur. Sondaı-aq Damır Jalǵasbaı pen Danıel Tazabekovtiń de aıaq alystary jaqsy.
