Parlament Májilisinde «Qazaqstan Respýblıkasynyń keıbir zańnamalyq aktilerine múgedektigi bar adamdardyń ómir súrý sapasyn jaqsartý máseleleri boıynsha ózgerister men tolyqtyrýlar engizý týraly» QR Zańynyń jobasyn tanystyrǵan depýtat Elnur Beısenbaev osylaı málimdedi.
«Múgedektigi bar balany sanatorıı-kýrorttyq emdeýge alyp júretin ata-anasynyń, zańdy ókiliniń birine mekemege ornalasý, tamaqtaný, jatyn oryny sııaqty birinshi qajettilik bolyp sanalatyn shyǵystarynyń quny óteledi. Bul bastama shalǵaı aýdandarda áleýmettik jaǵdaıy tómen otbasylardyń múgedektigi bar balasyna jan-jaqty sanatorıı-kýrorttyq em-dom alýǵa jol ashady. Al búgingi kúnge deıin atalǵan máseleni jergilik bıýdjet arqyly tek úsh aımaqta, onyń ishinde Nur-Sultan qalasy, Qaraǵandy jáne Pavlodar oblystarynan alyp júrýshi zańdy ókilderinen qarjy qarastyrylǵan edi», degen Májilis depýtaty bul asa mańyzdy normalardyń biri ekenin atap ótti.
Sondaı-aq ol zań jobasynda qarastyrylǵan qarjynyń basym bóligi osy normany oryndaýǵa qarastyrylatynyn basa aıtty.
«Bizdiń aldyn ala jobalap esepteýimiz boıynsha, 3 jyldyń ishinde keminde 62 myńnan astam bala men ata-anasy nemese olardyń zańdy ókilderi sanatorıı-kýrorttyq em-domǵa birge baratyn bolady. Atalǵan zań jobasynyń aıasynda emhanalardaǵy qyzmetti birinshi kezekte alý, úshinshi toptaǵy múgedektigi bar adamdardy notarıýstyq qyzmetter jasaýda aqy tóleýden bosatý normasy, 50 myń balaǵa arnalǵan psıhologııalyq-medısınalyq-pedagogıkalyq konsýltasııalar qurý qaǵıdaty, adam saýdasynyń qurbany bolǵan sheteldik azamattarǵa jan-jaqty áleýmettik qyzmet kórsetý boıynsha normalar engizildi. Qurmetti áriptester, atalǵan zań jobasynyń aıasynda 3 jyldyq respýblıkalyq bıýdjetten 5,9 mlrd teńge qarjy qarastyrylǵan. Zań jobasynyń oń tustaryn eskere kele, birinshi oqylymda qoldaýlaryńyzdy suraımyn», dedi Elnur Beısenbaev.
