Almaty qalalyq densaýlyq saqtaý basqarmasynyń málimetinshe, jazataıym oqıǵa 7 sáýir kúni bolǵan. 4 jastaǵy kishkentaı qyz Almatyda turǵyn úılerdiń biriniń segizinshi qabatynan qulap ketken. Aýrýhanaǵa jedel járdem kóligimen jetkizildi. Túsken kezde balanyń jaǵdaıy óte aýyr boldy. Dárigerler tekserip oǵan qosarlanǵan jaraqat degen dıagnoz qoıdy.
«Bas-mıy soǵylyp, eki ókpesi jyrtylyp ketken. Ásirese, sol jaq ókpesi qatty zaqymdanǵan. Sonymen qatar ókpe qýysynda qan, aýa jınalyp qalǵany anyqtaldy. Balaǵa shuǵyl túrde ota jasaldy. Operasııa kezinde biz sol jaq ókpesin tiktik. Kishkentaı naýqas bes kún jansaqtaý bóliminde jatty. Keıin jaǵdaıy jaqsarǵan soń palataǵa aýystyrdyq. 25 sáýir kúni aýrýhanada úıine shyqty», dedi balalar shuǵyl medısınalyq járdem ortalyǵy bas dárigeriniń orynbasary Dinmuhamed Rýzýddınov.
Dárigerdiń aıtýynsha, mamandar onyń jaǵdaıyn kún saıyn baqylap otyrady.
«Perishtesi qaqqan qyz balany ata-anasy aldaǵy ýaqytta mindetti túrde ońaltýdan ótkizýleri kerek», dedi dáriger.
