Kollajdy jasaǵan Záýresh Smaǵul, «EQ»
«Birligi joqtyń – tirligi joq». Halyq danalyǵy osylaı deıdi. Túıinniń bir qolmen baılanyp, bir qolmen sheshilmeıtinin bir kisideı bilip ketken baǵzy babalarymyzdyń aıryqsha amanaty da osy tatýlyq edi. Sol tatýlyqtyń tájin joǵary kóterip turyp egemen el atandyq. Alaıda azattyqtyń alǵysharty odan aıyrylyp qalmaý ekenin biri bilse, biri bile bermeıdi. Ol úshin bolattaı berik, júrekteı jumyr aýyzbirshilik qajet. Uly dala tósin meken etken árbir ulannyń kókireginde osy oı jatyr. Oǵan Qazaqstan deıtin qara shańyraqqa ýyq bolyp qadalyp, kerege bolyp kerilgen qanshama etnostyń tilegin qosyńyz. Mine, el ishindegi eren yntymaq bólinip, bórige jem bolmaýdy osylaı úlgi etti. Osylaı úıretti.
Qaz daýysty Qazybek bıdiń «Sózdiń atasy – birlik, anasy – shyndyq» degen bir aýyz sózin bútin el biledi. Sony baıypty baǵyt, laıyqty baǵdar etip alady. Búgingi urpaq osyny umytpasa, erteńgi el jastary erekshe ulyqtasa ıgi edi. Sebebi tatýlyqtan asqan baqyt ta, baılyq ta joq!
