Týrasyn aıtsaq, bılikte «bıleýshi partııa» degen uǵym bar. Barlyq laýazymdy sheneýnikter sol bılik partııasynyń ókili ekeni de málim. Buǵan deıin bılik basyndaǵylardyń barlyǵy da osy partııanyń múshesi bolǵandyqtan, jaǵdaı negizinen sol partııaǵa jasaldy. Basqa saıası kúshter onymen teńese almady.
Naqtyraq aıtsaq, saılaý kezinde de bılik partııasynyń basymdyǵy baıqalyp turdy, mektepter men ýnıversıtetterde, basqa da memlekettik organdarda qyzmetkerler bılik partııasyna jumys istedi. Endi Prezıdenttiń qadamynan keıin jaǵdaı teńesedi degen senim bar. Nege deseńiz Prezıdent Jańa jáne Ádiletti Qazaqstandy qurý qajettigin áńgimege arqaý etti. Bul degenińiz demokratııaǵa umtylys degendi bildiredi. Al sol demokratııalyq sıpat saılaý kezinde de ańǵarylýǵa tıis. Aldaǵy ýaqytta solaı bolýy qajet. Prezıdenttiń partııa tóraǵalyǵynan bas tartýy soǵan ákeledi degen senim mol. Endi burynǵydaı baı balasy men jarly balasynyń básekesine aınalǵan saıası kórinis qaıtalanbaıdy.
Jýyrda ǵana Prezıdent oblys, qala, aýdan ákimderi partııaǵa yqpal etpeýi kerektigin aıtqan bolatyn. Osyny jergilikti atqarýshy bıliktegiler men ózge de laýazymdy sheneýnikter qaperde ustaýy kerek. Ákimder endigári aldymen halyq úshin jumys isteýi, saılaýdyń, basqa da jumystardyń ádil júrgizilýine múddeli bolǵany lázim.
Prezıdent Amanat partııasy áleýmettik ádildikti ornyqtyrýǵa árdaıym basa mán beretinin aıtty. Adal partııasynyń Amanat partııasyna qosylýy qanshalyqty qajettilik bolǵanyn bilmeımin, eń bastysy, halyqqa adal qyzmet etse, partııanyń buǵan deıin aldyna qoıǵan maqsattary iske asady dep sanaımyn. Elimizde basqa da partııalar bar. Áli kúnge deıin aýyldyqtardyń amanatyn arqalaǵan «Aýyl» partııasy saıası ortadan yǵysqan joq. Aldaǵy saıası dodalarda jańa saıası partııalardyń qurylýy ábden yqtımal.
Elimizdegi barlyq salany túbegeıli monopolııasyzdandyrý asa mańyzdy ekenin Prezıdent aıtyp ótti. Bul – Jańa Qazaqstanǵa shynaıy kerek sóz. Rasynda da qoǵamdyq saıası kúsh bolsyn, jekelegen tulǵa bolsyn, olardyń barlyǵy da memlekettiń tutastyǵy men eldiń qamy úshin jumylýǵa qaqyly. Árbir azamattyń oryndy pikirin tyńdaý arqyly ǵana biz Jańa Qazaqstandy qura alamyz. Osyny qaperde ustaǵan jón.
Dáýletkereı KÁPULY,
Qazaqstan Jazýshylar odaǵynyń hatshysy, Nur-Sultan fılıalynyń dırektory
