Sábeń teatry Oralda óner kórsetti

Bul qyzyljarlyq óner ujy­mynyń Aq Jaıyq óńirine tuńǵysh sapary eken. Gastroldiń alǵash­qy kúni oraldyq kórermenge Maǵ­jan Jumabaevtyń «Sholpannyń kúnási» dramasy usynyldy. Hadısha Bókeeva atyndaǵy Batys Qazaqstan oblystyq qazaq drama teatrynda ıne shanshar jer bolmady. Maǵjannyń syrly da muńdy shyǵarmasy akterlerdiń sheber oıynymen, sahnalyq ádemi de qarapaıym sheshimdermen keremet ashylyp, kórermen júregine jol tapty. Osy kezge deıin eki festıvaldiń bas júldesin jeńip alǵan bul qoıylymdy teatrdyń negizin qalaýshy, 20 jyl osy ujymda qyzmet etken mádenıet qaıratkeri Batyrbek Shambetov sahnalaǵan eken.

– Biz gastrolge, teatr fes­tı­valderine jıi shyǵyp tura­myz. Jetken jetistigimiz de az emes. Osydan eki kún buryn ǵana Aqtóbe qalasynda ótken «Ba­laý­sa» eksperımentaldy teat­­ry­nyń «Úzdik akterlik ansam­bl» nomınasııasyn jeńip al­dyq. Jalpy, teatrymyzdyń quryl­ǵanyna 22 jyl boldy. 2000 jy­ly Mádenıetti qoldaý jyly ashylyp, sol jyly ǵasyrlyq ­mereıtoıy atalǵan jazýshy Sá­bıt Muqanovtyń esimin ıelengen edik. Sodan beri ótken 22 jyl ishinde 100-ge jýyq qoıylym sahnalappyz. Degenmen búgingi saparymyzdyń jóni bólek. Oral qalasyna tuńǵysh kelýimiz. Biz úshin óte tolǵanysty, qyzyqty sapar bolǵaly tur. Munda bizdi áriptesimiz, Hadısha teatry­nyń basshysy Nurjan Tasbolatov ujymymen jaqsy qarsy aldy. О́ner adamy kóńilge toıady ǵoı, mártebemiz kóterilip, kóńildi júrmiz, – deıdi bizge Qyzyl­jar teatrynyń dırektory Qazaq­stan Respýblıkasynyń mádenıet ­qaı­ratkeri Birjan Jalǵasbaev.

Teriskeı teatrynyń 40-qa jýyq qyzmetkeri Aq Jaıyq­qa tórt qoıylym alyp kelipti. Joǵaryda atalǵan «Sholpannyń kúnásinen» bólek, ıtalııalyq dramatýrg Karl Galdonıdiń «Ve­nesııalyq egizder» kome­dııa­­sy del arte stılinde, ıaǵnı kó­­­rer­menmen etene aralasqan kúı­­­­de usynylmaq. Serbııalyq ja­zýshy Bronıslav Nýshıchtiń «Qa­­rapaıym adam» qoıylymy adam­­dy tazalyqqa, adaldyqqa, ma­habbatqa, jaqsylyqqa tár­bıe­leıdi. Al kishkentaı kórer­menderge qazaq halyq ertegisi ne­gizinde sahnalanǵan «Qańbaq shal» qoıylymy tartý etilmek.

Birjan Nurmahanulynyń aıtýynsha, qazir Petropavl qa­la­synda Sábıt teatryna ar­nal­ǵan jańa ǵımarat salynyp jatyr eken. 500 kórermen sııa­tyn ǵımarat bıylǵy jyldyń sońynda paıdalaný­ǵa berilmek. Bul Soltústik Qa­zaqstan obly­synyń mádenı ómirinde úlken qýanysh, jańa­lyq bolǵaly tur.

– Buıyrsa áriptesterimiz­diń sol qýanyshyn bólisip, Qyzyljar qalasyna baratyn shyǵarmyz. Búgin Hadısha Bókeeva atynda­ǵy Batys Qa­zaqstan oblystyq qazaq drama teatry men Sábıt Muqanov atyndaǵy Soltústik Qazaqstan oblystyq sazdy-drama teatry arasynda áriptestik týraly memorandýmǵa qol qoı­dyq. Bul qujatta eki teatr ujy­mynyń áriptestigi, repertýar almasý, bir-birimizge barǵan kezde qol­daý kórsetý, t.b. sekildi eki­­jaq­ty kelisimder bar, – deıdi oral­dyq teatr jetekshisi Nurjan Tasbolatov.

Gastroldiń alǵashqy kúni Bir­jan Jalǵasbaev sahnaǵa shyǵyp, oraldyq kórermenge óte jyly qarsy alǵany úshin alǵysyn aıtty. Jáne osy Oral teatryn uzaq jyl basqarǵan óner qaıratkeri ári kóptegen shetel­dik dramalyq shyǵarmany qazaq tilinde sheber sóıletken aýdarmashy Qujyrǵalı Tóleýishevke shapan japty.

Aıta keteıik, qyzyljarlyq teatr trýppasynda batys­qazaq­standyq Ádiljan Kárimov pen Nurbol Asqarov degen qos akter on jyldan beri abyroıly qyzmet etip keledi eken. Osy qos ónerpazdyń qurmetine olardyń týǵan jeri – Qaztalov aýdanyna arnaıy baryp, qoıylym qoıý jos­parlanyp otyr. «Bul bizdiń aramyzda júrgen áriptesterimizdi qoldaý ári olardyń kindik kesken topyraǵyna qurmetimiz», deıdi Birjan Nurmahanuly.