Aqtóbe oblystyq Polısııa departamenti jazǵy demalys kezeńiniń bastalýyna baılanysty jazataıym oqıǵalardyń aldyn alý maqsatynda kámeletke tolmaǵan balalardyń bos ýaqytyn jáne júrip-turatyn jerlerin muqııat baqylaý qajet ekenin eskertedi.
Jaz mezgili bastalysymen kóshelerde jáne aýlalarda ata-anasynyń qadaǵalaýynsyz qalǵan balalardyń joǵalý jaǵdaılary jıiledi. Ata-analar tarapynan baqylaýdyń joqtyǵynan balalar jol-kólik oqıǵalarynyń qurbany bolyp, túrli jazataıym oqıǵalarǵa tap bolady.
Mysaly, 28 sáýirde Aǵaıyndy Jubanovtar kóshesinde ornalasqan kópqabatty úıdiń ekinshi qabatynan eki jasar qyz qulap ketken. Ol kezde anasy úıde bolǵan, biraq balany qaraýsyz qaldyrǵan. Qyz bala túrli dene jaraqattarymen balalar aýrýhasyna jatqyzyldy.
Osyǵan baılanysty Polısııa departamenti ata-analardan balalardy qaraýsyz qaldyrmaýdy suraıdy. Balalarǵa jol jáne sý aıdyndarynda qarapaıym júris-turys erejelerin úıretý kerektigin eskertedi.
Aıana Toǵanbek
