Elý jylda el jańa ekenin eskersek, Qazaqstannyń Konstıtýsııasy da birshama reformany talap etetini túsinikti. Referendým nátıjesinde Ata Zańymyzdyń úshten bir bóligi ózgerister men tolyqtyrýlar arqyly jańa mazmunǵa ıe bolmaq.
El Prezıdentiniń batyl bastamasyn qoldaǵan Qazaqstan Jastar kongresi 5 maýsymda ótetin referendýmǵa baılanysty dóńgelek ústel otyrysyn ótkizdi. Basqosýǵa jınalǵandar búkilhalyqtyq referendýmnyń memleket damýyndaǵy róline jan-jaqty toqtaldy.
«Jastar saıasatynyń salalyq jáne óńirlik baǵdarlamalaryn iske asyrý sheńberinde jas azamattardy eldiń áleýmettik-ekonomıkalyq jáne qoǵamdyq-saıası ómirine belsendi tartý úshin jaǵdaı jasaldy. Jastarmen jumystyń túbegeıli jańa nysandary engizildi. Sonymen qatar bolashaǵy zor jastar arasynda áleýmettik lıftiniń jan-jaqty ashyqtyǵyn qamtamasyz etý qajet. Jastar saıasatymen aınalysatyn azamattar men atqarýshy bılik ınstıtýttary arasynda júıeli túrde dıalog júrgizý jáne kommýnıkasııany durys qurý, jastardy el basqarýǵa kóbirek tartýdyń mańyzy zor. Bul óz kezeginde Qazaqstannyń jańarý men jańǵyrýyn qamtamasyz etedi. Sol sebepti aldaǵy referendýmǵa jastar sergek qaraýy kerek.
Aldaǵy búkilhalyqtyq referendým memleketimizdiń damýy úshin mańyzdy qadam bolyp otyr. Ata Zańymyz halyqtyń ún qatýymen 1995 jyly qabyldanǵan edi. Odan beri 27 jyl ótti. Bul baǵytta da reformalar kerektigin ýaqyttyń ózi kórsetti. Sondyqtan da Jańa Qazaqstandy qurý jolyndaǵy jańa qadamǵa bir kisideı atsalysýymyz kerek», dedi Qazaqstan Jastar kongresiniń atqarýshy dırektory Toqtar Bolysov.
Dóńgelek ústel otyrysyna qatysqan Parlament Májilisiniń depýtaty Elnur Beısenbaev, Qazaqstan Respýblıkasy Prezıdentiniń janyndaǵy Jastar saıasaty jónindegi keńes múshesi, Qazaqstan Team respýblıkalyq qoǵamdyq jastar birlestiginiń jetekshisi Oljas Súleımenov, Amanat partııasy qoǵamdyq saıasat ınstıtýty dırektorynyń orynbasary Dınara Sádýaqasova da aldaǵy referendýmnyń memleketimiz úshin asa zor mańyzǵa ıe ekenin sóz etip, oǵan Qazaqstan halqy jumylǵan judyryqtaı qatysýy kerektigin aıtty.
