Osylaısha sońǵy 11 jyl ishinde 54 myńnan astam atys qarýy jáne 2 mıllıonnan astam oq-dári erikti túrde tapsyrylǵan. Bul jumystar laıyqty túrde jalǵasyn taýyp ta keledi. Nátıjesinde, sońǵy bes jyldyń ishinde qarý-jaraqpen jasalǵan qylmystar sany elý paıyzǵa jýyq azaıǵan.
«Zańsyz saqtalǵan qarý-jaraqtardy erikti túrde tapsyrýǵa nıet bildirgen azamattar eger olardyń is-áreketinde ózge quqyq buzýshylyq quramy bolmasa, qylmystyq jáne ákimshilik jaýapkershilikten bosatylady. Bul aksııa bıyl 25 sáýirden bastaldy. Aksııany ótkizý úshin respýblıkalyq bıýdjetten 88 mıllıon teńgeden astam qarajat bólindi», dedi IIM Ákimshilik polısııa komıteti Qarý aınalymyn baqylaý bóliminiń basshysy Asylbek Ydyrysov baspasóz máslıhatynda.
Mınıstrlik ókiliniń aıtýynsha, qarýdy erikti túrde tapsyrǵan azamattar 306 myń teńgege deıin syıaqy ala alady eken. «О́temaqy máselelerine keletin bolsaq, qarýdy tapsyrǵany úshin tólemder mólsheri olardyń túrine, tehnıkalyq jaı-kúıine baılanysty ár birligi úshin (10 AEK-ten 100 AEK-ke deıin) 30 myńnan 306 myńǵa deıingi somany quraıdy. Syıaqy kólemin oblystyq, qalalyq jáne aýdandyq polısııa organdarynda qurylǵan arnaıy komıssııalar belgileıdi. Mysaly, júz aılyq eseptik kórsetkishke deıin nemese 306 myń teńgeni avtomatty oıyq qarýdy tapsyrǵan azamat ala alady. Mundaı somanyń jartysy oıyq uńǵyly myltyqtar men karabınder úshin tólenýi múmkin. Tapanshalar men revolverler úshin 122 myń teńgege deıingi mólsherde tólenedi. Al tegis uńǵyly myltyqtardyń árbir birligi 91 myń teńgege baǵalanýy múmkin», dedi bólim basshysy.
О́temaqy tóleý merzimi – 1 aı. Qarýdyń tehnıkalyq jaı-kúıin eskergen komıssııalar syıaqy mólsherin aıqyndaý kezinde qarý-jaraqty 3 sanatqa bóledi. 1-sanattaǵy qarý úshin tólem usynylatyn qunynyń – 100, 2-sanatqa – 70, 3-sanatqa 30 paıyzyn quraıdy.
«1-sanattaǵy qarýǵa – paıdalanylmaǵan jáne tehnıkalyq aqaýy joq qarý ne buryn paıdalanýda bolǵan, biraq aqaýy joq, taýarlyq túrine nuqsan kelmegen qarý jatady. 2-sanatta – odan ári paıdalanýǵa kedergi bolmaıtyn, jekelegen tehnıkalyq aqaýy bar nemese taýarlyq túrine nuqsan kelgen qarý bar. Jóndeýge jaramdy qarýlar da ekinshi sanatqa jatady. 3-sanatqa – tehnıkalyq aqaý saldarynan paıdalanýǵa jaramsyz nemese qaýipti, jóndeýge, qalpyna keltirýge nemese aýystyrýǵa jaramsyz qarýlar jiberiledi», deıdi IIM ókili.
Vedomstvo ókiliniń málimdeýinshe, «Qarý» aksııasy júrgizilgen birneshe jyl ishinde azamattar óz erikterimen eski qarýlardy da tabystaǵan kórinedi.
«2012 jyly Shyǵys Qazaqstan oblysynda erikti túrde tapsyrylǵan Ekinshi dúnıejúzilik soǵys kezinen qalǵan kalıbri 12,7 mm «Nıkonov-Semenov-Vladımırovskıı-Tankovyı» markaly tank pýlemeti, 2013 jyly Semeı qalasynda 1882 jyly Italııada shyǵarylǵan 32-kalıbrli «Vetterlı-Vıtalı» vıntovkasy jáne «Lefoshe» júıesiniń revolveri tapsyryldy. Sondaı-aq agenttik jumystarǵa arnalǵan 1936 jyly shyǵarylǵan kalıbri 6,5 mm «TOZ» oıyq uńǵyly tapanshasy ótkizilgen bolatyn. Soltústik Qazaqstan oblysynyń turǵyndary «Pıstolet-Pýlemet Shpagına» qarýyn tabystaǵan. Sonymen qatar Pavlodar oblysynda 1891 jyly shyǵarylǵan «Frolov» konstrýksııasynyń tegis uńǵyly atys qarýynyń kesindisin ıesi óz erkimen tapsyrdy. Komıssııa sheshimderine sáıkes bul qarý eksponat retinde Polısııa departamentteriniń mýzeılerine berilgen», dedi mınıstrlik ókili.
A.Ydyrysovtyń sózine sensek, turaqty túrde ótetin «Qarý», «Quqyqtyq tártip» jáne ózge óńirlik jáne respýblıkalyq jedel aldyn alý is-sharalarynyń arqasynda qarýmen jasalatyn qylmys túrlerin azaıtý múmkin bolǵan. Sondaı is-sharalardyń negizinde osy jyly 1 myń birlikten astam atys, onyń ishinde 158 oıyq uńǵyly qarý tárkilengen.
