«Qazaqstan saıası jáne áleýmettik-ekonomıkalyq ózgerister jolynda óz tarıhynyń jańa paraǵyn ashady. Qazaqstan Prezıdenti Qasym-Jomart Toqaev osy jyldyń naýryzynda «Jańa Qazaqstan» tujyrymdamasyn jarııa etti. Atalǵan tujyrymdama qoǵamnyń barlyq ómirin qamtıdy jáne zań shyǵarýshy bılik ınstıtýtyn nyǵaıtýǵa, árbir Qazaqstan azamatynyń saıası sheshimder qabyldaý prosesine qatysý múmkindigin keńeıtýge baǵyttalǵan. Taıaýda jańa Úkimet jasaqtalyp, onyń aldyna áleýmettik-ekonomıkalyq máselelerdi sheshý mindeti júkteldi. Sonymen qatar Qazaqstannyń ınvestısııalyq tartymdylyǵyn arttyrý úshin ınvestısııalyq saıasattyń jańa tujyrymdamasy ázirlenedi», dedi Roman Sklıar elordada ótip jatqan Qazaqstan-german bıznes forýmynda.
Onyń aıtýynsha, álemdik ekonomıkadaǵy týrbýlenttilik jaǵdaıda Qazaqstan men Germanııa arasyndaǵy ózara tıimdi yntymaqtastyqty damytý erekshe nazarǵa alynady.
«Eki el ortaq qundylyqtardy bólisedi jáne beıbitshilik pen turaqtylyqty nyǵaıtýdy jaqtaıdy. Qazaqstan energııanyń ártaraptanǵan kózderi, logıstıka jáne mol tabıǵı resýrstar syndy tartymdylyqtyń úsh faktoryna ıe. Bizde jasyl energııa óndirisine jáne ony odan ary eksporttaýǵa mol áleýet bar. Qytaıdan Eýropaǵa júk tasymaldaýda da elimizdiń tranzıttik áleýeti arta túsedi», dep túıindedi birinshi vıse-premer.
