Adamdar myqty dosymen

Aıtyp kelmeıtin apattyń Qaraǵandy óńirinde oryn alýy Arqa elindegi aǵaıynǵa aýyrǵa túskeni aqıqat. Kóp bolyp jumylyp, Kókpekti aýylyndaǵy asar jumysyna Qaraǵandy memlekettik tehnıkalyq ýnıversıtetiniń ujymy da bir jaǵadan bas, bir jeńnen qol shyǵaryp gýmanıtarlyq kómek kórsetýge oraı, oqý ornynyń bas korpýsynyń aldynda professorlyq-oqytýshylar quramy, «Jas orda» stýdentter men magıstranttar kásipodaǵynyń ókilderi jáne Elbasynyń kýrstastary, QarMTÝ-diń qurmetti stýdentteri Q.Omashev, E.Tóleýbaev, V.Nıkonov qatysqan mıtıng ótkizdi. «Buqar jyraý aýdanynyń Kók­­pekti aýylyndaǵy qaıǵyly oqı­ǵa barshamyzǵa málim. 5 adam­nyń ómirin qıyp, talaı adamdy bas­panasyz qaldyrǵan tilsiz jaýdyń zardabyn júzdegen otan­dastarymyz tutyp jatyr. Olarǵa kórsetken kómek elge bergen járdem. Olaı bolsa, kó­mek qolyn sozýǵa bilim ordasy­nyń ujymy biraýyzdan kelisip, ózderiniń bir kúndik jalaqysyn – 2,5 mıllıon teńge mólsherindegi qarjyny arnaýly esepshotqa aýdardy. JOO-nyń Aqsaqaldar alqasy men kásipodaq uıymy bas­tama jasap, ákimshilik uıytqy bolyp, hal­qymyz «tilsiz jaý» dep ata­ǵan qyzyl sýdan zardap shek­ken aýyl turǵyndarynyń turmys-tirshiligine qajetti zat­­tar­dy, azyq-túlikti, tósek-oryn­dy, kıim-keshekti 1 avtobýs, 2 «GAZel» kólikterine tıep, ar­naıy kómek kerýenin jiberip otyr­­myz», dedi QarMTÝ rektory, QR UǴA akademıgi Arystan Ǵa­zalıev. Osy jerde aıta ketken jón, baýyr­maldyq tek týystyq negiz­de ǵana kórinetin qasıet emes, ol – kisiniń adamgershilik, ıman­dylyq qasıetterin aıqyn­daıtyn minez-qulyqtyń jaǵymdy belgisi ekeni ámbege aıan. О́zgeni baýyryna tarta bilý, ár adamdy jaqyn sanap, qamqorlyq kórsetý sııaqty izgilik belgileri adamdar arasyndaǵy ózara syılastyqty, birin biri qurmetteý, jaqyn tutý sezimderin qalyptastyrady. Adamdardy tiline, dinine, ul­ty­na bólmeı, kez kelgen jaǵdaıda olarǵa kómektesýge daıyn tu­rý, qolushyn berý qasıeti de baýyr­maldyqtyń belgisi bolyp taby­lady. – Kúni keshegideı esimde, osydan 73 jyl buryn, 1941 jyldyń 7 qarashasynda biz Qaraǵandyǵa evakýasııamen sonaý Ýkraınadan, ataqty «Jas gvardııanyń» otany – Krasnodonnan keldik, – dep bas­tady óz sózin ónerkásip kóligi kafedrasynyń professory, tehnıka ǵylymdarynyń kandıdaty, «Qurmet Belgisi» ordeniniń ıegeri, eńbek ardageri Anatolıı Dedov.  –  Otbasynda shıetteı bes balamyz. Úlkenimiz 13-te, men 7 jastamyn, eń kishimiz emshektegi bala. Ákem Nıkanor Prohorovıch – shahter, Doneskidegi Par­homenko atyndaǵy zaýytty kóshirip kelýshilerdiń qatarynda boldy. Kelisimen №18 shahta janyndaǵy kúrdeli jumystar bóliminiń bastyǵy bolyp ornalasty. Jumys bar da, baspana joq. Sonda jergilikti qazaqtar jaqyn tartyp, baýyryna basty. Eski qaladaǵy bir bólmeli úlken jer úıde turdyq. Aty-jónderin umytyp qalyppyn, úı ıeleri qazaqtar edi. Otaǵasy shahter edi, zaıyby úı sharýasyndaǵy áıel. Eki balalary bolatyn. Asty-ústimizge túsip báıek bolyp, kórpe-jastyǵyn tósep, kıim-keshegin bólisip, dastarqanyn jaıyp, dámin berdi. Baraktar salynyp bitkenshe sol úı qutty qonysymyz boldy. Sol  shańyraqty bir atanyń bala­la­ryndaı tatý-tátti úsh aı panaladyq. Biz sonda qazaqtar­dyń qonaqjaılyǵyn, qaıyrym­dylyǵyn, baýyrmaldyǵyn al­ǵash ret tanyp-bildik. Mine, sol baýyrmaldyq, dostyq aq­jar­ma peıil kúni búginge deıin jalǵasýda. Men qandaı jaq­sy­lyq kórsem de, qazaq árip­tes­­terimnen kórip kelemin. Aqsa­qaldar alqasynyń múshesi­min. Al Kókpektidegi aǵaıyn­dar­ǵa búgin jasalyp jatqan qaltqy­syz kómek te sol izgilikti qadam­nyń zańdy jalǵasy... Aqsaqaldyń shyn júrekten shyqqan áserli sózin jınalǵan kóp­shilik yqylas qoıa tyńdady. Iá, «Aǵash tamyrymen, adam do­­sy­men myqty» degen osy da. Kóp uzamaı kómek kerýeni qa­la irgesindegi Kókpektige bet­tedi. Sábıt BEKSEIIT. QARAǴANDY.