Ekonomıka • 18 Mamyr, 2022

Altyn satyp alýdyń mańyzy

103 ret kórsetildi

Qazirgi geosaıası túsiniksizdik jáne qor naryǵyndaǵy qubylmalylyq jaǵdaıynda, sonymen qatar valıýta kýrsynyń kún saıyn ózgerýine oraı ınvestısııalaýdyń balama quraldaryna degen suranys jedel ósip jatyr. Bul rette eń senimdi alternatıvti qural retinde altyn atalady.

Álemde de, Qazaqstanda da altynǵa degen suranystyń qatty óskeni baıqalady. 2022 jyldyń naýryz aıynyń ózinde el turǵyndary jalpy salmaǵy 167,2 kılo bolatyn 8,3 myń altyn quımasyn satyp alǵan. 2021 jylmen salystyrǵanda satylǵan altyn quımalarynyń sany 2,9 ese, salmaǵy 3,5 ese ósken. Jalpy, byltyr salmaǵy 1,1 tonna bolatyn 32,3 myń ólsheýli quıma satyp alynǵan. О́lsheýli quıma naryǵy elimizdiń búkil óńirin qamtıdy, negizinen Almaty, Nur-Sultan jáne Atyraýda kóbirek satyldy. Altyn quımalarynyń 5, 10, 20, 50 jáne 100 gramdaǵy bes túri usynylǵan. Satyp alýshylar arasynda ásirese 10 gramdyq altyn erekshe suranysqa ıe. 2017-2021 jyldar aralyǵynda satylǵan altyn arasynda 10 gramdyq altynnyń úlesi 27 paıyzdy (23,4 myń) quraıdy. Eske salaıyq, Ulttyq bank 2017 jyldan beri halyqqa sertıfıkattalǵan tazartylǵan altyn quımalaryn satýdy bas­tady. Satýdyń basty maqsaty – qarjy jınaý úshin qazaqstandyqtarǵa qosymsha ınvestısııalyq qural usyný.

Qaı zamanda da altyn – quny joıyl­maıtyn, salmaǵy jeńildemeıtin stra­tegııalyq aktıv bolyp sanalady. Eger ınvestısııany altynmen jasar bolsańyz, jınaǵyńyzdy ınflıasııadan qorǵap qana qoımaı, kapıtalyńyzdy eselep arttyra da alasyz. Máselen, 2016 jyldan 2022 jylǵa deıin altyn baǵasy 76,4 paıyzǵa qymbattaǵan. Osynyń ózi-aq altynnyń ınvestısııalaýdaǵy teńdessiz aktıv bolaryn kórsetedi. Jalpy alǵanda, altyn joǵary ótimdilikke ıe, ol sizdi ınflıasııa men ekono­mıkalyq daǵdarystardan qorǵaıdy.

Ulttyq bank shyǵaratyn árbir altyn quımasy qorǵanys elementterimen (aına beti, mıkrotekst jáne bederli jıek) ja­raq­talǵan. Quıma qandaı da bir meha­­nı­­kalyq zalaldan saqtaıtyndaı, qorap­­shanyń ashylǵan-ashylmaǵanyn jedel teksere alatyndaı qylyp arnaıy qorap­shada shyǵarylady. Sondaı-aq qorǵa­nys qorapshasy quıma sapasynyń sertıfıkaty bolyp esepteledi.

Qazirgi kezde altyn quımalaryn Halyk Bank, «Eýrazııalyq bank», Jusan Bank jáne «Bank SentrKredıt» bólimshelerinen, sonymen birge jekelegen banktik emes aıyrbastaý beketterinen satyp alyp, qaıta satýǵa bolady.

Ulttyq banktiń tazartylǵan quımalar jáne ınvestısııalyq monetter naryǵyn damytý boıynsha Aýstralııanyń Pert qalasyndaǵy teńge saraıynyń tájirıbesine súıene otyryp, sıfrly aktıvterdi engizýi múmkin. Teńge saraıy InfiniGold kompanııasynyń kómegimen óziniń qoımasyn altyndy saqtaý, qaýipsizdik jáne komıssııalyq shyǵyndarsyz satyp alǵysy keletin qarapaıym ınvestorǵa «vırtýaldy beınede» usynady. Aýstralııa úkimetiniń kepildigindegi sary metaldy kez kelgen ýaqytta kez kelgen jerde otyryp-aq 0,02 dollar mınımaldy somasyna satyp alýǵa múmkindik bar. Bizde de osyndaı tájirıbe engizilse, onda paıdalanýshylar onlaın-platformada Ulttyq banktiń ınvestısııalyq quraldaryn satyp alǵan­dyǵy týraly sertıfıkatty satyp alady jáne sata alady. Bul rette naqty ınvestısııalyq quraldar Ulttyq banktiń kepildigimen arnaıy qoımada saqtalady.

Sońǵy jańalyqtar

ShQO-nyń Samar aýdanyna ákim taǵaıyndaldy

Taǵaıyndaý • Búgin, 19:33

Oral qoqys astynda qalýy múmkin

Aımaqtar • Búgin, 16:47

Dollar qaıta qymbattady

Qarjy • Búgin, 15:58

Almatydaǵy órtten tórt adam qutqaryldy

Aımaqtar • Búgin, 15:40

Almatyda Pfizer vaksınasyna suranys artty

Koronavırýs • Búgin, 14:50

Uqsas jańalyqtar