Klýb múshelerimen birge qoǵam qaıratkerleri, saıasattanýshylar referendýmǵa qatysty mańyzdy máselelerdi kóterip, jalpyhalyqtyq daýys berý eldiń saıası júıesine qalaı áser etetinin talqylap, oı jarystyrdy.
Is-sharany «Qazaqstandyq qoǵamdyq damý ınstıtýty» KeAQ basqarma tóraǵasy Qazybek Maıgeldınov júrgizdi. «Referendým azamattardyń memlekettik basqarýǵa neǵurlym keń qatysýyn kózdeıtin, halyqtyń qoldaýymen elimizdiń jańa saıası júıege kóshýine barynsha yqpal etýge baǵyttalǵan», dedi ol óz sózinde.
Jýrnalıst, Amanat partııasy saıası bıýrosynyń múshesi Maqsat Tolyqbaı Jańa Qazaqstan uranynyń kún tártibinen túspeı turǵanyn, alaıda bul bastamanyń aldymen zań, qujat júzinde sóıleý kerektigin alǵa tartty.
«Qoǵam naqty qadamdardy kútedi. Sondyqtan referendým bılik úshin emes, aldymen halyq úshin kerek. Referendýmǵa barǵanda aqparat bilip barý mańyzdy. Sebebi, Konstıtýsııanyń 33 babyna tolyqtyrýlar engizilmek, biraq erteń daýys bererde osy ózgeristerdi qoldaısyń ba degen suraqqa «ıá» jáne «joq» degen eki jaýap qana bolady. Búginde referendým boıynsha túsinikti tilmen jazylǵan qysqasha beınerolıkter áleýmettik jelilerde jaqsy pikirler jınaýda. Túsindirý jumystary boıynsha áleýmettik jelilerdiń de múmkindigin paıdalanǵan durys», dep referendýmnyń ótýi qoǵam úshin mańyzdy ekenin atap ótti. Saıasattanýshy Islam Kýraev: «Referendýmǵa halyq qatysý úshin, olarǵa úgit-nasıhat júrgizý kerek. Sarapshylar qaýymdastyǵy referendýmda daýys berýge shaqyra otyryp, halyqqa bul múmkindiktiń ne beretini týraly ashyp aıtýy qajet. Sonda halyq referendýmǵa barady. Halyqqa qarapaıym tilmen túsindirý óte mańyzdy» dedi.
Al Y.Altynsarın atyndaǵy Ulttyq bilim akademııasy Ákimshilik basqarý departamentiniń dırektory Janat Chýkeev referendým elimiz úshin irgeli ózgeristerge jol ashady dep sanaıdy. «Konstıtýsııalyq reforma – qoǵamdy demokratııalandyrýdyń shynaıy qadamy. Bul referendým sýperprezıdenttik modelden Parlamenttiń rólin kúsheıtý, halyqtyń eldi basqarýǵa qatysýyn keńeıtý, azamattardyń quqyqtaryn qorǵaýdyń konstıtýsııalyq tetikterin kúsheıtý sııaqty irgeli ózgeristerge jol ashady», dedi sarapshy. Sonymen qatar «Qazaqstan halqyna» qoǵamdyq qorynyń resmı ókili, jýrnalıst Áıgerim Esenáli «Halyq únine qulaq asatyn memleket» tujyrymdamasynyń kórinisi referendým ekendigin aıtty.
«Jańa Qazaqstan degenimiz – ádilettilik erejeleri qalyptasqan qoǵamy bar memleket. 2019 jyly alǵash sóz etken «Halyq únine qulaq asatyn memleket» tujyrymdamasynyń ómirdegi, praktıkalyq kórinisteriniń biri – referendým. Árbir azamattyń memlekettik qurylymnyń, reformalardyń, damý mehanızmderiniń bir bólshegi, qozǵaýshy kúshi retinde jaýapkershiligin arttyrýda úlesi zor tarıhı prosess oń nátıjelerge bastaıtynyna seneıik», dep atap ótti qordyń resmı ókili. «Elimizdiń árbir azamaty saıası reformalarǵa qatysýy tıis. Referendýmnyń maqsaty da sol, memleket azamattardan quralady, referendým halyq únin estý jolyndaǵy tıisti mehanızm», dedi Elbasy Akademııasy jobalyq keńesiniń basshysy Bolat Buharbaı.
Otyrysqa qatysýshylar referendýmdy ótkizý ıdeıasyn qoldap, Konstıtýsııaǵa engiziletin túzetýler jobasy saıası ınstıtýttardyń qurylymdyq qaıta qurýlaryn qamtıtynyn atap ótti. Is-shara Referendýmdy qoǵamdyq qoldaý respýblıkalyq shtabynyń qoldaýymen ótkizildi.
