Aımaqtar • 20 Mamyr, 2022

«Aq qaýyrsyn» ádebı syılyǵynyń ıegerleri anyqtaldy

Almaty oblysy ákiminiń «Aq qaýyrsyn» júldesi bıyl besinshi ret ótti. Dástúrli ádebı baıqaý Jazýshylar odaǵy Almaty oblystyq fılıalymen, «Janr» Jetisý ádebı klýbymen jáne Halyqaralyq «Qazaq tili qoǵamy» qoǵamdyq birlestigi oblystyq fılıalymen birlese uıymdastyryldy.

Qalmahanbet MUQAMETQALI

Baıqaý osy joly Ult ustazy Ahmet Baıtursynulynyń 150 jyldyq mereıtoıy jáne Almaty oblysynyń 90 jyldyǵyna oraı jarııalanyp otyr. Baıqaýdyń maqsaty ult ustazy Ahmet Baıtursynulynyń eńbekteri men shyǵarmashylyǵyn, Almaty oblysynyń 90 jyldyǵyn keńinen nasıhattaý, ulttyq qundylyqtardy dáripteıtin qazirgi ádebıetti damytý jáne oǵan qoldaý kórsetý boldy. Baıqaýdyń poezııa báıgesine Ahmet Baıtursynulynyń 150 jyldyq mereıtoıyna oraı «El búginshil, meniki erteń úshin» taqyrybyna óleń arnaý usynylsa, proza báıgesi Almaty oblysynyń 90 jyldyǵyna arnaldy. Báıgege 18-35 jas aralyǵyndaǵy qalamgerler, aqyndar, jýrnalıster aýdandyq, qalalyq irikteý kezeńinen ótken baıqaýdyń jeńimpazdary óz shyǵarmalaryn joldady.

«Baıqaý bıyl besinshi márte qalam ustaǵan jastardyń shabytyn ashyp, ary qaraı shyǵarmashylyǵyn shyńdaýyna oń serpin berip otyr. Almaty oblysynda aqyn-jazýshylarǵa, jas qalamgerlerge degen qamqorlyq erekshe. Sonyń biri osy - «Aq qaýyrsyn» ádebı syılyǵy. Bul baıqaý Jetisý ólkesindegi ádebıetshil qaýymnyń asyǵa kútetin mereıli saltanatyna, rýhanı-ádebı tanymdyq sharalardyń birine aınalyp otyr», deıdi oblystyq Tilderdi damytý basqarmasynyń basshysy Rahmet Esdáýletov.

Qazylar alqasynyń sheshimi boıynsha poezııa janry boıynsha I oryn Almaty oblysy «Jetisý» radıosynyń redaktory Arshyn Aıdynbekuly ıelendi. II oryn Almaty oblystyq «Jetisý» gazetiniń tilshisi Máýlen Ánerbaıǵa buıyrdy. Sarqandyq Samal Shengelbaeva III orynnyń tuǵyrynan kórindi. Sondaı-aq Alakól aýdanynyń Qońyr orta mekteptiń qazaq tili men ádebıet pániniń muǵalimi Maqsat Deńgelbaı men I. Jansúgirov atyndaǵy Jetisý ýnıversıtetiniń 2 kýrs bilimgeri Ádil Quttybaev poezııa janry boıynsha yntalandyrý syılyǵyna ıe boldy.

Al proza janry boıynsha I oryndy Gúlden Jylkeldıeva qanjyǵalady. Jáne baıqaýdyń II oryn júldesin Aıgerim Iebekova enshilese, III oryn Oljas Naýryzbaevqa buıyrdy. Bul baıqaýdyń I oryn ıegerlerine «Aq qaýyrsyn» atty Almaty oblysy ákiminiń arnaıy júldesi tabystaldy.

Sondaı-aq saltanatty sharada ulttyq qundylyq, salt-dástúrimizdi dáripteý maqsatynda áleýmettik jelide ótken shyǵarmashylyq «Naýryz shashý» baıqaýynyń jeńimpazdary marapattaldy.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz