Polısııanyń málimetinshe, jeńil kólik qatty jyldamdyqpen kelip traktordyń tirkemesine soǵylǵan.
«Nissan Cefiro avtokóligi Almaty oblysy Tekeli qalasynan Qalbataý aýylyna qaraı kele jatqan. Tas joldyń 959-shaqyrymynda 36 jastaǵy kólik júrgizýshisi jyldamdyqty asyryp, «Belarýs 82,1» traktorynyń tirkemesine soǵylǵan», delingen polısııa habarlamasynda.
Saldarynan oqıǵa ornynda 36 jastaǵy júrgizýshi men 4 jolaýshy til tartpastan jan tapsyrdy. Taǵy bir adam túrli jaraqatpen aýrýhanaǵa jetkizildi.
Qazir polısııa Qylmystyq kodekstiń 345-baby, 4-bóligi «Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy saldarynan abaısyzda eki nemese odan da kóp adamnyń ólimine ákep soqqan is-áreket» boıynsha tergeý bastady.
