Medısına • 24 Mamyr, 2022

Medısınalyq poıyzdar jolǵa shyqty

39 ret kórsetildi

Medısınalyq poıyzdar elimizdiń shalǵaı aýdandarynyń 60 myńǵa jýyq turǵynyna sapaly medısınalyq kómek kórsetedi, dep habarlaıdy Egemen.kz.

Atalǵan jobanyń nátıjesinde shalǵaı aýdan turǵyndaryna kópbeıindi mobıldi medısınalyq kómek alýǵa qoljetimdi bolady. Pandemııa jaǵdaıynda jáne álemde qalyptasqan epıdemıologııalyq ahýalǵa oraı sapaly medısınalyq servıske qoljetimdilik óte mańyzdy bolyp tabylady. Osy sebepti poıyzdar medısınalyq-sanıtarlyq alǵashqy jáne konsýltasııalyq-dıagnostıkalyq kómekter kórsetip, pasıentterdi zerthanalyq ádistermen tekseristen ótkizedi. Qajet bolǵan jaǵdaıda kishigirim otalar jasaıdy, josparly emdeýge jatqyzýǵa joldama beredi. Bul óz kezeginde eldimekenderdiń aýdandyq jáne oblystyq aýrýhanalardan shalǵaıda ornalasýyna baılanysty turǵyndardyń aýrýyn der kezinde anyqtamaý jáne emdemeý saldarynan týyndap otyrǵan ótkir máseleni sheshýge kómektesedi.

2022 jyly Qazaqstan boıynsha eki medısınalyq poıyzdyń baǵdary josparlanǵan. Poıyzdar jalpy alǵanda, shalǵaıda ornalasqan 147 stansııaǵa barady.

j

«Járdem» medısınalyq poıyzy 23 mamyrdan 6 qarashaǵa deıin 80 stansııany, al «Salamatty Qazaqstan» 20 maýsymnan 2 qarashaǵa deıin 67 stansııany aralaıdy. Poıyzdar jalpy sany 60 myń adamdy qamtymaq. Atap aıtqanda, dárigerlerdiń qabyldaýyna kelý sany 100 myń, dıagnostıkalyq emsharaǵa 18 myń, shaǵyn hırýrgııalyq operasııaǵa 1 200 bolsa, 8 myń adamǵa stomatologııalyq kómek kórsetiledi dep kútilýde. Medısınalyq poıyzdar búkil Qazaqstandy aralaıdy. Máselen, «Járdem» – Qyzylorda, Batys Qazaqstan, Aqtóbe, Atyraý, Mańǵystaý, Túrkistan, Jambyl oblystaryna, «Salamatty Qazaqstan» Almaty, Shyǵys Qazaqstan, Pavlodar, Soltústik Qazaqstan, Aqmola, Qostanaı jáne Qaraǵandy oblystaryna barady.

Densaýlyq saqtaý mınıstrligi poıyzdardy dárigerlik brıgadalarmen jáne qajetti jabdyqtarmen qamtamasyz etedi. Medısınalyq personaldyń quramynda ártúrli beıindegi bilikti mamandar: terapevt, pedıatr, kardıolog, nevropatolog, oftalmolog, gınekolog, hırýrg, ýrolog, mammolog jáne stomatolog baryn atap ótken jón. Bıyl bilikti  mamandardyń qatary psıholog jáne dermatovenerologpen tolyqty.  Medısınalyq jabdyqtar japon jáne nemis óndirýshileriniń ónimi. Olardyń qatarynda apparatýra qajet bolǵan jaǵdaıda keńeıtilgen jalpy jáne bıohımııalyq taldaýlar, rentgenografııa men flıýrografııa, ishki aǵzalar men tamyrlardyń ÝDZ-zertteýlerin, elektrokardıogramma, gastrofıbroskopııa jáne  dıagnostıkalyq zertteýlerdiń basqa da túrlerin júrgizýge múmkindik beredi. Sonymen qatar bıyl stamotologııalyq qurylǵylar da jańartylǵan.

Eske sala keteıik, atalǵan joba eń alǵash ret 2010 jyly iske qosylyp, 2019 jyly koronavırýstyq pandemııaǵa oraı toqtatylǵan bolatyn. Osy kezeń ishinde «Densaýlyq», «Járdem» jáne «Salamatty Qazaqstan» atty úsh konsýltasııalyq-dıagnostıkalyq poıyz Qazaqstannyń shalǵaıda ornalasqan 1700-den asa eldimekenin aralap, 488 881 turǵyndy tekserýden ótkizdi. Onyń ishinde 101 614 bala bar. Sonymen qatar 1 647 138 dıagnostıkalyq em-shara, 11 981 kishi ambýlatorııalyq operasııa ótkizildi. Mammolog mamandar 67 148 áıeldi qabyldasa, jalpy adamdar dárigerdiń qabyldaýynda 2 873 542 ret boldy.

Joba Indýstrııa jáne ınfraqurylymdyq damý jáne Densaýlyq saqtaý mınıstrlikteriniń qoldaýymen, «Samuryq-Qazyna» AQ kompanııalar tobynyń atynan «Samruk-Kazyna Trust» áleýmettik jobalardy damytý qory, «Qazaqstan Temir Joly» UK AQ-men birlesip iske asyrylady.

Sońǵy jańalyqtar

Dollar arzandady

Qarjy • Keshe

Uqsas jańalyqtar