Bilim jáne ǵylym mınıstrligi túlekterdiń ustazdaryna syılyq jasaýyna bolmaıtynyn eske saldy. Mektep ákimshiligi men muǵalimderge syılyq alý úshin aqsha jınaýǵa, oıyn-saýyq mekemelerinde bitirý keshin uıymdastyrýǵa da ruqsat joq. Dese de, sońǵy qońyraýda ustazdarǵa gúl syılaýǵa bolady.
«Jyl saıyn 1 qyrkúıek nemese 25 mamyr qarsańynda «Muǵalimge gúl syılaýǵa bola ma, bul zańbuzýshylyq bolyp sanalmaı ma?» degen suraq týyndaıdy. Bizdiń ustanymymyz - ıá, bolady. Bul jaqsy dástúr ǵoı», deıdi mektepke deıingi jáne orta bilim komıtetiniń tóraıymy Gúlmıra Kárimova.
Qazaqstannyń barlyq mektebinde sońǵy qońyraý merekesi 25 mamyrda ótedi. Al 16-17 maýsymda attestatty saltanatty tapsyrý rásimi ótkiziledi.
