Soǵyldy sońǵy qońyraý

Bilim jáne ǵylym mınıstrligi «TÚLEK-2022 – Jańa Qazaqstannyń erteńi» bitirý is-sharalaryn ótkizý boıyn­sha usynystar daıyndady. Bul týraly Mektepke deıingi jáne orta bilim ko­mı­tetiniń tóraıymy Gúlmıra Kárimova:«Sońǵy qońyraý – muǵalimder men oqýshylar oqý jyly­nyń qorytyndy­syn shyǵaryp, bilim alýshylar­dyń jetistikterin atap ótetin kóńildi ári mańyzdy oqıǵa. Bıyl epıdemııalyq jaǵdaı mekteppen qoshtasý merekesin ótkizýge múmkindik berip tur. Alaıda bul mindetti túrde mektep qabyrǵasynda uıymdastyrylýy kerek. Bilim berý uıymdary barlyq qajetti usynys pen nusqaýdy aldy. 2022 jyly elimizde 3,5 mln-nan asa oqýshy úshin sońǵy qońyraý soǵylady. Bıyl «Altyn belgi» tósbelgisine 8 139 túlek úmitker bolyp otyr. Taǵy qosa keterim, jyl saıyn 1 qyrkúıek nemese 25 mamyr qarsańynda qoǵamda «Muǵalimge gúl syılaýǵa bola ma jáne bul zań buzýshylyq bolyp sanalmaı ma?» degen suraq týady. Bizdiń aıtarymyz: ıá, bolady. Bul jaqsy dástúr ǵoı», dedi.

Mınıstrliktiń málimdeýin­she, res­pýb­lıkanyń barlyq jalpy bilim beretin mektebinde sońǵy qońyraý mere­kesin bir mezgilde ótkizý jospar­lanǵan. Oǵan oqý oshaǵynyń pedagogıkalyq ujy­my, túlekter jáne olardyń ata-ana­lary, pedagog ardager­ler, qamqorshylyq keńes músheleri, de­meý­shi uıymdar, Bilim jáne ǵylym mı­nıstr­­ligi men oblystar, Nur-Sultan, Alma­ty, Shymkent qalalary bilim bas­qarmalarynyń ókilderi, bilim bólimderi, múddeli memlekettik organdar jáne t.b. qatysa alady.