Ońtústik Koreıada parom apatynan qaza bolǵandar kóp

Ońtústik Koreıada «Sevol» paromynyń apatqa ushyraýy saldarynan qaza bolǵandar sany 25 adamǵa jetti. Bul týraly ITAR-TASS habarlady. Keshe keshkisin aýa raıynyń qolaısyzdyǵynan toqtatylǵan izdeý-qutqarý jumystary qaıta jalǵasyp, teńizden taǵy 16 adamnyń denesi tabyldy. «Sevol» paromy sársenbi kúni Ońtústik Koreıanyń ońtústik-batys jaǵalaýyndaǵy Pıonphýndo aralynan 20 shaqyrym jerde apatqa ushyrady. Keme Inchhon portynan Chedjýdo aralyna qaraı baǵyt alǵan. Onyń bortynda 475 adam bolǵan. Qazirgi ýaqytta 179 jolaýshy qutqarylsa, 271 adam iz-tússiz joǵalǵandar qatarynda. Mamandardyń pikirinshe, parom sý astyndaǵy jartastarǵa soǵylǵan bolýy kerek. «Sevol» paromynyń kapıtanyna qatysty tergeý amaldary júrip jatyr. Oǵan jolaýshylardy qutqarý úshin tıisti sharalar qabyldaýdyń ornyna, apatqa ushyraǵan kemeden alǵashqylardyń biri bolyp qashqan degen aıyp taǵylǵan. Aıdar О́risbaev. Derekkóz: Itar-tass.com. Foto: Itar-tass.com.